മരട്‌: ബസിനു പിന്നില്‍ വാന്‍ ഇടിച്ചുണ്ടായ അപകടത്തില്‍ 13 യാത്രക്കാര്‍ക്കു പരിക്കേറ്റു. ഇന്നലെ വൈകുന്നേരം വൈറ്റില- അരൂര്‍ ബൈപ്പാസിലെ കുമ്പളം സ്കൂള്‍ പടി ബസ്സ്റ്റേപ്പിലായിരുന്നു അപകടം. റോഡരികില്‍ നിര്‍ത്തിയിട്ട്‌ യാത്രക്കാരെ ഇറക്കുകയായിരുന്ന കെഎസ്‌ആര്‍ടിസി ബസിനു പുറകിലാണ്‌ വിവാഹ പാര്‍ട്ടി സഞ്ചരിച്ച ടെമ്പോവാന്‍ ഇടിച്ചത്‌. വാനില്‍ യാത്രചെയ്തിരുന്ന 13 പേര്‍ക്കാണ്‌ പരിക്കേറ്റത്‌. ഇതില്‍ രണ്ടുപേരുടെ നില ഗുരുതരമാണ്‌. ഇടിയുടെ ആഘാതത്തില്‍ വാനിന്റെ മുന്‍വശം പൂര്‍ണമായും തകര്‍ന്നു.
പരിക്കേറ്റയാത്രക്കാരെ മരടിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്‌. ആലുവയില്‍നിന്നും അരൂരിലേക്കു പോവുകയായിരുന്ന ബസിനു പിന്നിലാണ്‌ തൈക്കുട്ടത്തുനിന്നും പൂച്ചാക്കലേക്ക്‌ വിവാഹ സല്‍ക്കാരത്തില്‍ പങ്കെടുക്കുവാന്‍ പോകുകയായിരുന്നു സംഘം സഞ്ചരിച്ച വാന്‍ ഇടിച്ചത്‌. പൂച്ചാക്കല്‍ വലിയത്തും പാടം സോമന്‍ (45) കൊച്ചുകുഞ്ഞ്‌ (50) എന്നിവര്‍ക്കാണ്‌ അപകടത്തില്‍ ഗുരുതരമായി പരിക്കേറ്റത്‌. ഫയര്‍ഫോഴ്സ്‌ സ്ഥലത്തെത്തി രക്ഷാപ്രവര്‍ത്തനം നടത്തി.
പ്രതികരിക്കാൻ ഇവിടെ എഴുതുക: