സതാര: മഹാരാഷ്‌ട്രയില്‍ ദളിത്‌ യുവതിയെ നഗ്നയാക്കി നടത്തിച്ച സംഭവത്തില്‍ സംസ്ഥാന വനിതാ കമ്മീഷന്‍ റിപ്പോര്‍ട്ട്‌ ആവശ്യപ്പെട്ടു. ഇതിനുത്തരവാദികളായവര്‍ക്കെതിരെ കര്‍ശന നടപടി സ്വീകരിക്കണമെന്നും കമ്മീഷന്‍ നിര്‍ദേശിച്ചു. എത്രയും വേഗം നടപടി എടുക്കണമെന്നും അല്ലാത്ത പക്ഷം കര്‍ത്തവ്യത്തില്‍ അലംഭാവം കാട്ടിയതിന്‌ ശിക്ഷ അനുഭവിക്കാന്‍ തയ്യാറായിക്കൊള്ളണമെന്നും ഭരണകൂടത്തിന്‌ കമ്മീഷന്‍ മുന്നറിയിപ്പ്‌ നല്‍കി.
മഹാരാഷ്‌ട്രയിലെ സതാര ജില്ലയിലെ മുല്‍ഗാവോണ്‍ ഗ്രാമത്തിലാണ്‌ ഈ സംഭവം നടന്നത്‌. മുതിര്‍ന്ന ജാതിയില്‍പ്പെട്ടവരാണ്‌ രേഖ ചവാന്‍ എന്ന 42 കാരിയെ നഗ്നയാക്കി നടത്തിയത്‌. ഇവരുടെ മകന്‍ സവര്‍ണ ജാതിയില്‍പ്പെട്ട പെണ്‍കുട്ടിയുമായി ഒളിച്ചോടിപ്പോയതാണ്‌ പ്രകോപനത്തിന്‌ കാരണമായത്‌. ഇവരെ ക്രൂരമായി മര്‍ദ്ദിച്ച്‌ അവശയാക്കുകയും ചെയ്തു.
സംഭവത്തില്‍ പോലീസ്‌ അഞ്ച്‌ പേരെ അറസറ്റ്‌ ചെയ്തിട്ടുണ്ട്‌. ഇവര്‍ക്കെതിരെ ഇന്ത്യന്‍ ശിക്ഷാ നിയമം 143, 149, 354, 324 വകുപ്പുകള്‍ പ്രകാരം കേസ്‌ രജിസ്റ്റര്‍ ചെയ്തിട്ടുണ്ട്‌.
പ്രതികരിക്കാൻ ഇവിടെ എഴുതുക: