ന്യൂദല്‍ഹി: കാശ്മീരില്‍ അതിര്‍ത്തിയിലൂടെ നുഴഞ്ഞുകയറ്റം ശക്തമായതിനാലും പാക്കിസ്ഥാന്റെ സാന്നിധ്യമുള്ളതിനാലും ജമ്മുകാശ്മീരില്‍ സേനക്ക്‌ നല്‍കിയിരിക്കുന്ന പ്രത്യേക അധികാരം പിന്‍വലിക്കേണ്ടന്ന നിലപാടില്‍ പ്രതിരോധ മന്ത്രാലയം ഉറച്ചുനില്‍ക്കുന്നു. സുരക്ഷാസേനക്ക്‌ നല്‍കിയിരിക്കുന്ന പ്രത്യേക അധികാരം അക്രമങ്ങള്‍ കുറഞ്ഞിട്ടുണ്ടെങ്കിലും നുഴഞ്ഞുകയറ്റം തുടരുന്നതിനാല്‍ പിന്‍വലിക്കാനാവില്ലെന്ന്‌ പ്രതിരോധമന്ത്രി എ.കെ. ആന്റണി വ്യക്തമാക്കി. അതിര്‍ത്തിയില്‍ സദാ ജാഗ്രത പുലര്‍ത്തേണ്ടതുണ്ടെന്ന്‌ 1971 ലെ ബംഗ്ലാദേശിന്റെ വിമോചനത്തിലേക്ക്‌ നയിച്ച ഇന്തോ-പാക്‌ യുദ്ധത്തിന്റെ രക്തസാക്ഷികളെ അനുസ്മരിക്കുന്ന ചടങ്ങില്‍ പങ്കെടുക്കാനെത്തിയ പ്രതിരോധമന്ത്രി അറിയിച്ചു. കാശ്മീരില്‍ സൈന്യത്തിന്‌ നല്‍കിയിരിക്കുന്ന പ്രത്യേക അധികാരം പിന്‍വലിക്കുന്നതിനെക്കുറിച്ച്‌ പ്രതിരോധ, ആഭ്യന്തര മന്ത്രാലയങ്ങള്‍ തമ്മില്‍ നേരിയ അഭിപ്രായവ്യത്യാസങ്ങള്‍ നിലനില്‍ക്കുകയാണ്‌. അക്രമരഹിതമായ ശ്രീനഗര്‍, ബഡ്ഗാം, ജമ്മു, ഡാംഭ എന്നിവിടങ്ങളില്‍നിന്ന്‌ പ്രത്യേക അധികാരം പിന്‍വലിക്കുന്നതില്‍ വിരോധമില്ലെന്നാണ്‌ ആഭ്യന്തരമന്ത്രാലയത്തിന്റെ നിലപാട്‌.
നുഴഞ്ഞുകയറ്റത്തിനെതിരെ ഇത്തരം പ്രത്യേക അധികാരങ്ങളില്ലാതെ പ്രവര്‍ത്തിക്കുന്നത്‌ ബുദ്ധിമുട്ടാണെന്നാണ്‌ സൈന്യത്തിന്റെ നിലപാട്‌. തങ്ങളുടെ പ്രവര്‍ത്തനങ്ങള്‍ക്ക്‌ നിയമപരമായ സാധുത നല്‍കാന്‍ നിയമം ആവശ്യമാണെന്നാണ്‌ അവരുടെ വാദം.
പ്രതികരിക്കാൻ ഇവിടെ എഴുതുക: