നെടുമ്പാശ്ശേരി: കൊച്ചി അന്താരാഷ്‌ട്ര വിമാനത്താവളത്തിലെ ഡ്യൂട്ടി ഫ്രീ ഷോപ്പ്‌ നടപ്പു സാമ്പത്തിക വര്‍ഷം 100 കോടി രൂപ വിറ്റുവരവ്‌ ലക്ഷ്യമിടുന്നു. 2002ല്‍ പ്രവര്‍ത്തനം തുടങ്ങിയ കൊച്ചിന്‍ ഡ്യൂട്ടി ഫ്രീഷോപ്പ്‌ ഇന്ന്‌ രാജ്യത്തെ ഏറ്റവും മികച്ച എയര്‍പോര്‍ട്ട്‌ ഡ്യൂട്ടി ഫ്രീ ഷോപ്പുകളിലൊന്നാണ്‌.
വ്യോമയാനേതര വരുമാനം വര്‍ദ്ധിപ്പിക്കുന്നതിലൂടെ യാത്രക്കാരുടെയും വിമാനക്കമ്പനികളുടെയും മേല്‍ ഭാരം ചുമത്താതെ എയര്‍പോര്‍ട്ട്‌ ലാഭകരമായി നടത്തുക എന്നതാണ്‌ സിയാലിന്റെ ബിസിനസ്‌ മോഡല്‍.
ഇലക്ട്രോണിക്‌ ഐറ്റംസ്‌, മുന്തിയ ഇനം പെര്‍ഫ്യൂമുകള്‍, ചോക്ലേറ്റ്‌ ഉല്‍പ്പന്നങ്ങള്‍, കളിപ്പാട്ടങ്ങള്‍, സ്വര്‍ണാഭരണങ്ങള്‍ എന്നിങ്ങനെ ഡ്യൂട്ടി ഫ്രീ ഷോപ്പുകളില്‍ ലഭിക്കുന്ന എല്ലാ ഉല്‍പ്പനങ്ങളുടെയും ഒരു നീണ്ട ശ്രേണി തന്നെയാണ്‌ സിയാല്‍ ഡ്യൂട്ടി ഫ്രീ ഷോപ്പിലുള്ളത്‌. യൂറോപ്പില്‍നിന്നും ഗള്‍ഫ്‌ രാജ്യങ്ങളില്‍നിന്നുമുള്ള പ്രമുഖ ബ്രാന്‍ഡുകള്‍ എല്ലാം ഇവിടെ ലഭ്യമാണ്‌. വിദേശരാജ്യങ്ങളിലെ ഡ്യൂട്ടി ഫ്രീ ഷോപ്പുകളില്‍ നിന്നും ലഭിക്കുന്ന മുന്തിയ ഗുണനിലവാരമുള്ള അതേ ഉല്‍പ്പന്നങ്ങള്‍ അവിടുത്തേക്കാള്‍ 10 മുതല്‍ 15 ശതമാനം വരെ വിലക്കുറവില്‍ ഇവിടെ നിന്നും ലഭിക്കുന്നു. തന്മൂലം വിദേശമലയാളികള്‍ക്ക്‌ ഈ ഉല്‍പന്നങ്ങള്‍ കൊച്ചിന്‍ ഡ്യൂട്ടിഫ്രീയില്‍ നിന്നും വാങ്ങുകയാണെങ്കില്‍ ബാഗേജിനത്തില്‍ വന്നുചേരാവുന്ന അധികച്ചെലവും, മറ്റു ബുദ്ധിമുട്ടുകളും ഒഴിവാക്കാന്‍ സാധിക്കുകയും ചെയ്യും.
2012 ജനുവരി 31 വരെ ഇവിടെ നിന്നും സാധനങ്ങള്‍ വാങ്ങുന്നവര്‍ക്ക്‌ അത്യാകര്‍ഷകമായ ഓഫറുകളും സമ്മാനപദ്ധതികളും ഒരുക്കിയിരിക്കുന്നു. ഏറ്റവും പുതിയ മോഡല്‍ കാറായ നിസ്സാന്‍ സണ്ണി കാറാണ്‌ ഇതിലൊന്ന്‌. കൂടാതെ ആഴ്ചതോറും നറുക്കെടുപ്പിലൂടെ എല്‍ഇഡി ടെലിവിഷന്‍, പ്രതിദിന നറുക്കെടുപ്പിലൂടെ വിവിധ സമ്മാനങ്ങള്‍, ഡിസ്കൗണ്ട്‌ തുടങ്ങിയവയും ഉപഭോക്താക്കള്‍ക്കായി ഡ്യൂട്ടി ഫ്രീ ഷോപ്പ്‌ നല്‍കുന്നുണ്ട്‌.
ഡ്യൂട്ടി ഫ്രീ ഷോപ്പ്‌ വികസനത്തിന്റെ ഭാഗമായി 8 കോടി രൂപ മുതല്‍മുടക്കില്‍ ഓഫീസ്‌/ ഡ്യൂട്ടി ഫ്രീ വെയര്‍ഹൗസ്‌ നിര്‍മിക്കുന്നതിനുള്ള പ്രാഥമിക നടപടികള്‍ തുടങ്ങിക്കഴിഞ്ഞു. 50000 ചതുരശ്ര അടി വിസ്തീര്‍ണമുള്ള ഡ്യൂട്ടി ഫ്രീ വെയര്‍ഹൗസില്‍ അത്യാധുനിക റാക്കിംഗ്‌ സംവിധാനം ഉണ്ടായിരിക്കും. വരുന്ന പതിനഞ്ച്‌ വര്‍ഷത്തേക്കുള്ള ആവശ്യങ്ങള്‍ക്ക്‌ പര്യാപ്തമായ നിലയിലാണ്‌ പുതിയ വെയര്‍ഹൗസ്‌ നിര്‍മിക്കുന്നത്‌. യാത്രക്കാരുടെ എണ്ണം വര്‍ദ്ധിക്കുന്നതിനനുസരിച്ച്‌ ഇഷ്ടമുള്ള ഉല്‍പ്പന്നങ്ങള്‍ ഗള്‍ഫ്‌ നാടുകളില്‍ ലഭിക്കുന്നതിനേക്കാള്‍ വിലക്കുറവില്‍ കൊച്ചിയില്‍ നിന്നും വാങ്ങുന്നതിനുള്ള സൗകര്യങ്ങളൊരുക്കി സിയാല്‍ ഡ്യൂട്ടി ഫ്രീ ഷോപ്പ്‌ മുന്നേറുകയാണ്‌.
പ്രതികരിക്കാൻ ഇവിടെ എഴുതുക: