ന്യൂദൽഹി: പശ്ചിമേഷ്യയിൽ തുടരുന്ന സംഘർഷത്തെക്കുറിച്ച് പ്രധാനമന്ത്രി നരേന്ദ്രമോദിയുമായി സംസാരിച്ച് അമേരിക്കൻ പ്രസിഡൻ്റ് ഡൊണാൾഡ് ട്രംപ്. ഇറാൻ ഏർപ്പെടുത്തിയ നിർണായക പാതയിലൂടെ എണ്ണ, ഊർജ്ജ കപ്പലുകളുടെ നീക്കത്തിന് നിയന്ത്രണങ്ങൾ ഏർപ്പെടുത്തുന്നതിനിടയിലും ഹോർമുസ് കടലിടുക്ക് തുറന്നിടേണ്ടതിന്റെ പ്രാധാന്യത്തെക്കുറിച്ചും ട്രംപ് ചൊവ്വാഴ്ച പ്രധാനമന്ത്രിയുമായി സംസാരിച്ചു. മേഖലയിലെ സമാധാനം പുനഃസ്ഥാപിക്കുന്നതിനും എണ്ണ, ഊർജ്ജ വ്യാപാരത്തിനായി ഹോർമുസ് തുറന്നിടുന്നതിനും ഇന്ത്യയുടെ പിന്തുണ പ്രധാനമന്ത്രി മോദി ആവർത്തിച്ചു പറഞ്ഞു. ഇറാനെതിരായ യുഎസ്-ഇസ്രായേൽ യുദ്ധം ആരംഭിച്ചതിനുശേഷം ഇതാദ്യമായാണ് ഇരു നേതാക്കളും സംസാരിക്കുന്നത്.
ഇന്ത്യയിലെ യുഎസ് അംബാസഡർ സെർജിയോ ഗോർ ഇരു നേതാക്കളും തമ്മിലുള്ള സംഭാഷണത്തെക്കുറിച്ച് എക്സിൽ പോസ്റ്റ് ചെയ്തു. “പ്രസിഡന്റ് ഡൊണാൾഡ് ട്രംപ് പ്രധാനമന്ത്രി മോദിയുമായി സംസാരിച്ചു. ഹോർമുസ് കടലിടുക്ക് തുറന്നിടേണ്ടതിന്റെ പ്രാധാന്യം ഉൾപ്പെടെ മിഡിൽ ഈസ്റ്റിലെ നിലവിലുള്ള സാഹചര്യത്തെക്കുറിച്ച് അവർ ചർച്ച ചെയ്തു,” ഗോർ തന്റെ പോസ്റ്റിൽ എഴുതി.
ഇതിനു പുറമെ ട്രംപുമായുള്ള സംഭാഷണത്തെക്കുറിച്ച് പ്രധാനമന്ത്രി മോദിയും എക്സിൽ പങ്കുവച്ചു. “പ്രസിഡന്റ് ട്രംപിൽ നിന്ന് ഒരു കോൾ ലഭിച്ചു, പശ്ചിമേഷ്യയിലെ സ്ഥിതിഗതികളെക്കുറിച്ച് ഉപയോഗപ്രദമായ അഭിപ്രായങ്ങൾ പങ്കുവെച്ചു. എത്രയും വേഗം സംഘർഷം ലഘൂകരിക്കുന്നതിനും സമാധാനം പുനഃസ്ഥാപിക്കുന്നതിനും ഇന്ത്യ പിന്തുണ നൽകുന്നു. ഹോർമുസ് കടലിടുക്ക് തുറന്നതും സുരക്ഷിതവും ആക്സസ് ചെയ്യാവുന്നതുമായി തുടരുന്നത് ഉറപ്പാക്കേണ്ടത് ലോകമെമ്പാടും അത്യാവശ്യമാണ്. സമാധാനത്തിനും സ്ഥിരതയ്ക്കും വേണ്ടിയുള്ള ശ്രമങ്ങളുമായി ബന്ധപ്പെട്ട് ബന്ധം നിലനിർത്താൻ ഞങ്ങൾ സമ്മതിച്ചു,” – പ്രധാനമന്ത്രി മോദി തന്റെ പോസ്റ്റിൽ എഴുതി.
അതേ സമയം ഇറാനെതിരായ ആസൂത്രിത ആക്രമണങ്ങൾ നിർത്തലാക്കുമെന്ന് ഡൊണാൾഡ് ട്രംപ് പ്രഖ്യാപിച്ചതിന് ഒരു ദിവസത്തിന് ശേഷമാണ് ടെഹ്റാനുമായി മികച്ച രീതിയിൽ ചർച്ചകൾ നടത്തിയെന്ന് ട്രംപ് അവകാശപ്പെട്ടത്. തുടർന്ന് ഹോർമുസ് കടലിടുക്ക് വീണ്ടും തുറക്കണമെന്ന വ്യവസ്ഥയിൽ ഇറാനിയൻ വൈദ്യുതി നിലയങ്ങൾക്ക് നേരെയുള്ള ആക്രമണം അഞ്ച് ദിവസത്തേക്ക് വൈകിപ്പിച്ചെന്നും ട്രംപ് ആഹ്വാനം ചെയ്തത്.
