ഇന്ത്യൻ ആർമിയുടെ ഗജ്രാജ് കോർപ്സിന്റെ ആഭിമുഖ്യത്തിൽ പ്രചണ്ഡ് ലൈറ്റ് കോംബാറ്റ് ഹെലികോപ്റ്ററുകളുടെ ലൈവ് ഫയറിംഗ് അഭ്യാസം . വെല്ലുവിളി നിറഞ്ഞ ഉയർന്ന പർവ്വത മേഖലകളിലായിരുന്നു അഭ്യാസപ്രകടനങ്ങൾ. കൃത്യമായ സ്ട്രൈക്കുകളിലും മൾട്ടി-ഡൊമെയ്ൻ പ്രവർത്തനങ്ങളിലും പ്രചണ്ഡ് കരുത്ത് തെളിയിച്ചു.
മലനിരകളിലെ യുദ്ധത്തിനായി രൂപകൽപ്പന ചെയ്തിരുക്കുന്ന ലൈറ്റ് കോംബാറ്റ് ഹെലികോപ്റ്ററാണ് പ്രചണ്ഡ്. തദ്ദേശീയമായി നിർമ്മിക്കുന്ന ഇന്ത്യയുടെ ഈ ഹെലികോപ്റ്ററുകൾ ലോകത്തിലെ ഏറ്റവും ഉയരത്തിൽ പറന്ന് യുദ്ധം ചെയ്യാൻ കെൽപ്പുള്ള പോരാളിയുമാണ്. പ്രതിരോധ ഗവേഷണ വികസന സംഘടനയുമായി (DRDO) സഹകരിച്ച് ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL) വികസിപ്പിച്ചെടുത്ത പ്രചണ്ഡ് കർശനമായ പരീക്ഷണങ്ങൾക്ക് ശേഷം 2022 ലാണ് സൈന്യത്തിനൊപ്പം ചേർന്നത്.
15,000 അടി ഉയരത്തിലായിരുന്നു പ്രചണ്ഡിന്റെ അഭ്യാസപ്രകടനങ്ങൾ. . ഇന്ത്യയുടെ വടക്കുകിഴക്കൻ അതിർത്തികൾ സുരക്ഷിതമാക്കുന്ന ഗജ്രാജ് കോർപ്സിലെ സൈനികർ നടത്തിയ പരീക്ഷണങ്ങളിൽ പ്രചണ്ഡിന്റെ വേഗതയും, കൃത്യതയും നിർണായകമാണെന്ന് തെളിഞ്ഞു. പരമ്പരാഗത ഹെലികോപ്റ്ററുകൾ പതറുന്ന ഉയർന്ന ഉയരങ്ങളിലെ നേർത്ത വായുവിൽ പോലും, 7 കിലോമീറ്ററിൽ കൂടുതലുള്ള പരിധികളിൽ കവചിത ഭീഷണികളെ നേരിടാൻ കഴിവുള്ള ഹെലിന ആന്റി-ടാങ്ക് ഗൈഡഡ് മിസൈലുകളെ പ്രചണ്ഡ് കൃത്യമായി വിന്യസിച്ചു.
പ്രചണ്ഡ്, സിയാച്ചിൻ ഗ്ലേസിയറിൽ (സമുദ്രനിരപ്പിൽ നിന്ന് 5,000 മീറ്ററിലധികം ഉയരത്തിൽ) ലാൻഡ് ചെയ്യാനും ടേക്ക് ഓഫ് ചെയ്യാനും സാധിക്കുന്ന ലോകത്തെ ഏക അറ്റാക്ക് ഹെലികോപ്റ്ററാണ്. മുൻഭാഗത്ത് ഘടിപ്പിച്ചിരിക്കുന്ന 20 എം.എം ടററ്റ് ഗൺ (M621 cannon). പൈലറ്റിന്റെ ഹെൽമറ്റിന്റെ ചലനത്തിനനുസരിച്ച് ഈ തോക്ക് തിരിയുകയും ലക്ഷ്യം ഭേദിക്കുകയും ചെയ്യും.ആകാശത്ത് നിന്ന് ആകാശത്തേക്ക് തൊടുക്കാവുന്ന മിസ്ട്രൽ (Mistral) മിസൈലുകളുണ്ട്. ഭാവിയിൽ ‘ധ്രുവാസ്ത്ര’ പോലുള്ള ആന്റി-ടാങ്ക് ഗൈഡഡ് മിസൈലുകളും ഇതിൽ ഘടിപ്പിക്കും.
