യാത്രകളെ അതിയായി ഇഷ്ട്ടപ്പെടുന്ന ബോളിവുഡ് നടിയാണ് സാറ അലി ഖാൻ. മഹാദേവന്റെ ഭക്തയായതിനാൽ യാത്രയ്ക്കിടയിലോ, പുതിയ സിനിമകളുടെ റിലീസിന് മുമ്പോ നടി ശിവക്ഷേത്രങ്ങൾ സന്ദർശിക്കാറുണ്ട്. ഇതേതുടർന്ന് നിരവധി വിമർശനങ്ങളാണ് സാറയ്ക്ക് ലഭിക്കുന്നത്.
ഒരിക്കൽ മഹാശിവരാത്രിയോടനുബന്ധിച്ച് താരം കേദാർനാഥിൽ ദർശനം നടത്തിയതിനെ തുടർന്ന് ട്രോളുകളിൽ നിറഞ്ഞെങ്കിലും ക്ഷേത്രത്തിൽ നിന്നുള്ള ചിത്രങ്ങൾ പങ്കുവെക്കുന്നതിൽ താരം മടികാണിച്ചില്ല. ചന്ദനമണിഞ്ഞ് ഭക്തിനിർഭരയായിരിക്കുന്ന ചിത്രങ്ങളായിരുന്നു ശിവരാത്രി ദിനത്തിൽ സാറാ അലി ഖാൻ പങ്കുവച്ചത്. ‘ജയ് ബോലേ നാഥ്’ എന്ന തലക്കെട്ടോടെയായിരുന്നു പോസ്റ്റ്. എന്നാൽ ചിത്രത്തിനടിയിൽ മതമൗലികവാദികളടക്കം വലിയ വിമർശനവുമായി എത്തുകയായിരുന്നു. അതിനു തക്ക മറുപടിയും സാറ അന്ന് നൽകിയിരുന്നു. ഇന്ന് കേദാർനാഥിലെ പ്രവേശനത്തിന്റെ പേരിൽ സാറയെ പലരും പരിഹസിക്കുമ്പോൾ ഈ മറുപടി വീണ്ടും വൈറലാകുകയാണ്.
താൻ ആരാധകർക്ക് വേണ്ടി മാത്രമാണ് അഭിനയിക്കുന്നത്. അതിനാൽ തന്റെ അഭിനയത്തെക്കുറിച്ച് പ്രേക്ഷകർക്ക് എന്തെങ്കിലും പരാതിയുണ്ടെങ്കിൽ, അത് തന്നെ ബാധിക്കുന്നതാണെന്നും, എന്നാൽ തന്റെ വ്യക്തിപരമായ കാര്യങ്ങളിലോ ജീവിതരീതിയിലോ ആർക്കെങ്കിലും പ്രശ്നമുണ്ടെങ്കിൽ, താൻ അത് കാര്യമാക്കുന്നില്ലെന്നും സാറാ അലിഖാൻ പറഞ്ഞു.
നിരവധി ആരാധകരാണ് സാറയെ പിന്തുണച്ച് രംഗത്തെത്തിയത്. ഇത് അവളുടെ വിശ്വാസമാണെന്നും അവളുടെ ഇഷ്ടത്തിനനുസരിച്ച് എന്തും ചെയ്യാൻ അവൾക്ക് സ്വാതന്ത്ര്യമുണ്ടെന്നുമാണ് ആരാധകർ പയുന്നത്. പട്ടൗഡി നവാബ് ആയിരുന്ന മൻസൂർ അലി ഖാന്റെ പിൻതലമുറക്കാരിയും നടൻ സെയ്ഫ് അലി ഖാന്റെ മകളുമായ സാറാ അലി ഖാൻ ശിവരാത്രി ആഘോഷങ്ങളിൽ പതിവായി പങ്കുചേരാറുള്ള വ്യക്തിയാണ്
