പത്തനംതിട്ട : അവയവങ്ങള് ദാനം ചെയ്ത പത്തുമാസം മാത്രം പ്രായമുളള ആലിന് ഷെറിന് ഏബ്രഹാമിനു ആദരാഞ്ജലി അര്പ്പിച്ച കേന്ദ്ര സഹമന്ത്രി സുരേഷ് ഗോപി ഈ മുഹൂര്ത്തവുമായി താദാത്മ്യം പ്രാപിക്കാന് കഴിയുന്ന അച്ഛനാണ് താനെന്ന് പറഞ്ഞു.പ്രധാനമന്ത്രിയുടെ നിര്ദേശ പ്രകാരമാണ് താന് എത്തിയതെന്നും അദ്ദേഹം പറഞ്ഞു.
ശിവരാത്രി ചടങ്ങുകള്ക്കായി കോയമ്പത്തൂരിലേക്കുള്ള യാത്രാമധ്യേ ആണ് പ്രധാനമന്ത്രി നരേന്ദ്ര മോദി വിളിച്ചത്.തുടര്ന്ന് യാത്ര ഉപേക്ഷിച്ച് മല്ലപ്പള്ളിയില് എത്തിയ കേന്ദ്രമന്ത്രി, പ്രധാനമന്ത്രിക്കുവേണ്ടി അനുശോചനം അറിയിച്ചു.
നമ്മുടെ കൊച്ചു കേരളത്തിനു വലിയ സന്ദേശമാണ് ആലിന് നല്കിയത്. അവയവദാനത്തിലൂടെ ഒട്ടേറെപ്പേര്ക്ക് പുതുജീവന് നല്കിയ ആലിന് മലയാളികളുടെ ഇടയില് എന്നും ജീവിക്കും- സുരേഷ് ഗോപി പറഞ്ഞു.
മുമ്പ് ദല്ഹിയിലും ഒഡീഷയിലും 6 വയസും 16 മാസവും പ്രായമുള്ള കുട്ടികള് അവയവ ദാനം നടത്തിയ സംഭവവും കേന്ദ്രമന്ത്രി ഓര്ത്തെടുത്തു. എല്ലാവരുടെയും ദുഃഖത്തില് പങ്കുചേരുന്നുവെന്ന് പറഞ്ഞ സുരേഷ് ഗോപി കുഞ്ഞുമോള് ഇനി ദൈവമാണെന്നും അഭിപ്രായപ്പെട്ടു.
