അബുദാബി: യുഎഇയിലെ എമിറേറ്റ്‌സ് ലേബര്‍ മാര്‍ക്കറ്റ് അവാര്‍ഡ് സ്വന്തമാക്കിയവരില്‍ മലയാളിയും. പത്തനംതിട്ട കൂടല്‍ സ്വദേശിയും മുസഫ എല്‍എല്‍എച്ച് ആശുപത്രിയിലെ നഴ്സിങ് സൂപ്പര്‍വൈസറുമായ മായ ശശീന്ദ്രനാണ് അവാര്‍ഡ് നേടിയത്. ഔട്ട്സ്റ്റാന്‍ഡിങ് വര്‍ക്‌ഫോഴ്‌സ് വിഭാഗത്തിലാണ് മായ പുരസ്‌കാരം നേടിയത്.
75,000 ദിര്‍ഹം (17 ലക്ഷം രൂപ) ആണ് മായയ്‌ക്ക് ലഭിച്ച അവാര്‍ഡ് തുക. നഴ്സിങ് വിഭാഗത്തില്‍ പുരസ്‌കാരം ലഭിച്ച ഏക മലയാളിയാണ് മായ ശശീന്ദ്രന്‍. ആരോഗ്യസേവന രംഗത്തെ മികവാണ് മായയെ അവാര്‍ഡിന് അര്‍ഹയാക്കിയത്.
പുരസ്‌കാര തുകയായ 17 ലക്ഷം രൂപക്ക് പുറമെ സ്വര്‍ണ നാണയവും ആരോഗ്യ ഇന്‍ഷുറന്‍സും മൊബൈല്‍ ഫോണും ഡിസ്‌കൗണ്ട് കാര്‍ഡും മായയ്‌ക്ക് ലഭിച്ചു. നേരത്തെ ബുര്‍ജീല്‍ ഗ്രൂപ്പിന് കീഴില്‍ ബെസ്റ്റ് നഴ്‌സ്, ബെസ്റ്റ് പെര്‍ഫോര്‍മര്‍, ജെം ഓഫ് ദ് ക്വാര്‍ട്ടര്‍ തുടങ്ങി ഒട്ടേറെ പുരസ്‌കാരങ്ങള്‍ മായയ്‌ക്ക് ലഭിച്ചിട്ടുണ്ട്. കൊവിഡ് കാലത്ത് മലയാളി സമാജം ആദരിച്ച മികച്ച 10 നഴ്‌സുമാരില്‍ മായയുമുണ്ടായിരുന്നു. പത്തനംതിട്ട മായാവിലാസത്തില്‍ ശശീന്ദ്രന്റെയും ലീലയുടെയും മകളാണ് മായ. ഭര്‍ത്താവ് കോട്ടയം സ്വദേശി അജി നൈനാന്‍. മകന്‍ ആരോണ്‍ (അഞ്ചാം ക്ലാസ് വിദ്യാര്‍ത്ഥി).
പ്രതികരിക്കാൻ ഇവിടെ എഴുതുക: