പാനൂര്‍: സമുദ്രനിരപ്പില്‍ നിന്ന് 2600 അടി ഉയരത്തില്‍ സ്ഥിതിചെയ്യുന്ന പ്രകൃതി സൗന്ദര്യം നിറഞ്ഞൊഴുകുന്ന വാഴമല പ്രദേശം ഉരുള്‍പൊട്ടല്‍ ഭീഷണിയില്‍. പാനൂരിലെ പാനോളി തറവാട്ടിലെ കെട്ടിലമ്മ ആദിവാസികള്‍ക്ക് പതിച്ചുനല്‍കിയതാണ് ഈ മലനിരകള്‍. മലനിരകളിലെ 2000 ഏക്കര്‍ ഭൂമി പോത്തന്‍ ജോസഫ് എന്ന വ്യക്തി വിലയ്‌ക്ക് വാങ്ങുകയും തുടര്‍ന്ന് മരങ്ങള്‍ വെട്ടിമാറ്റപ്പെടുകയും ചെയ്തു. ആദിവാസികളുടെ ഭൂമി മിച്ചഭൂമിയായി സര്‍ക്കാര്‍ ഏറ്റെടുത്തു. ഭൂമി വാങ്ങിയവര്‍ക്ക് പട്ടയം ലഭിച്ചതോടെയാണ് ക്വാറികള്‍ പ്രവര്‍ത്തനമാരംഭിച്ചത്.
70 ല്‍ അധികം ക്വാറികളാണ് തൃപ്പങ്ങോട്ടൂര്‍ ഗ്രാമപഞ്ചായത്തിലെ വാഴമല മേഖലയില്‍ പ്രവര്‍ത്തിച്ചുവരുന്നത്. കഴിഞ്ഞദിവസം പെയ്ത ശക്തമായ മഴയില്‍ മണ്ണിടിഞ്ഞ് വാഴമല റോഡ് ഗതാഗതം തടസ്സപ്പെട്ടിരുന്നു. കരിങ്കല്ലുമായി നിരവധി ടോറസ് വാഹനങ്ങള്‍ ഓടുന്നതിനാല്‍ വാഴമല റോഡ് പൊട്ടിപ്പൊളിഞ്ഞു കിടക്കുകയാണ്. പ്രദേശത്ത് ഏഴ് ക്വാറികള്‍ക്ക് മാത്രമേ പ്രവര്‍ത്തന അനുമതിയുള്ളൂ. ബാക്കി മുഴുവന്‍ അനുമതിയില്ലാതെ പ്രവര്‍ത്തിച്ചുവരികയാണ്.
പട്ടികജാതി പട്ടികവര്‍ഗ്ഗ കുടുംബാംഗങ്ങളാണ് വാഴമല കോളനികളില്‍ താമസിച്ചുവരുന്നത്. ശക്തമായ മഴ പെയ്യുന്നതിനാല്‍ കോളനി നിവാസികളെ സാംസ്‌കാരികകേന്ദ്രത്തിലേക്ക് മാറ്റിപ്പാര്‍പ്പിച്ചിരിക്കുകയാണ്. സാംസ്‌കാരിക കേന്ദ്രവും സുരക്ഷിതമല്ല. കോളനി നിവാസികളെ മലയ്‌ക്ക് താഴെ സുരക്ഷിതമായ കേന്ദ്രത്തിലേക്ക് മാറ്റിപ്പാര്‍പ്പിക്കണമെന്നാണ് ആവശ്യം.
നരിക്കോട് മലയിലെ ക്രഷറിന് സമീപമുള്ള പാലം ടോറസ് വാഹനങ്ങള്‍ കടന്നുപോകുന്നതിനാല്‍ അപകടാവസ്ഥയിലായി ഏത് സമയത്തും തകരുമെന്ന നിലയിലാണുള്ളത്. പാലം തകര്‍ന്നാല്‍ പ്രദേശവാസികള്‍ക്ക് പൊയിലൂരില്‍ എത്താനുള്ള മാര്‍ഗം മുത്തപ്പന്‍ മടപ്പരയിലേക്കുള്ള റോഡാണ്. പ്രസ്തുത റോഡും തകര്‍ന്നുകിടക്കുകയാണ്.
ഏഴ് മലകളുടെ സംഗമഭൂമിയാണ് വാഴമല പ്രദേശം. പാത്തിക്കല്‍ മല, കുട്ടി കൊളുത്തായി, കൊളുത്തായ് മല, പന്നിയങ്കാവ്, നരിക്കോട് മല, വാഴമല എന്നിവ ചേര്‍ന്നതാണ് വാഴമല പ്രദേശം. പൊയിലൂരില്‍ നിന്നും ചെറുവാഞ്ചേരിയില്‍ നിന്നും വാഴമലയിലേക്കെത്താം. ചെറുപറമ്പില്‍ നിന്നും പാത്തിക്കല്‍ വഴി വാഴമലയിലേക്ക് പോകാം. വാഴമലയിലെ വെള്ളച്ചാട്ടം, വിമാനപ്പാറ എന്നിവ ആകര്‍ഷകങ്ങളാണ്. ഒറ്റക്കല്ലില്‍ വിമാനം ലാന്‍ഡ് ചെയ്തത് പോലെയുള്ളതാണ് വിമാനപാറ. കോടമഞ്ഞും തണുത്ത കാറ്റും വാഴമലയുടെ പ്രത്യേകതയാണ്. പുനലൂരില്‍ നിന്ന് 12 കിലോമീറ്ററും ചെറുവാഞ്ചേരിയില്‍ നിന്ന് 15 കിലോമീറ്ററും കോളയാട് നിന്ന് 8 കിലോമീറ്ററും ദൂരമുണ്ട് വാഴമലയിലേക്ക്.
മുണ്ടക്കൈ ദുരന്തത്തിനുശേഷം പ്രദേശവാസികള്‍ ആശങ്കയിലാണുള്ളത്. അധികാരികള്‍ കണ്ണ് തുറക്കണമെന്നാണ് പ്രദേശവാസികള്‍ ആവശ്യപ്പെടുന്നത്. അനുമതിയില്ലാതെ പ്രവര്‍ത്തിക്കുന്ന ക്വാറികള്‍ അടച്ചുപൂട്ടണം. ഉരുള്‍പൊട്ടാന്‍ സാധ്യതയുള്ള പ്രദേശമാണിത്. ദുരന്തനിവാരണ സേനയുടെ ഒരു യൂണിറ്റ് പ്രദേശത്ത് സ്ഥാപിക്കണമെന്ന ആവശ്യം ഉയര്‍ന്നുവന്നിട്ടുണ്ട്. രാഷ്‌ട്രീയ, സാമ്പത്തിക സ്വാധീനം ഉപയോഗിച്ചാണ് മാഫിയകള്‍ ക്വാറികള്‍ പ്രവര്‍ത്തിപ്പിക്കുന്നത്. ക്വാറി പ്രവര്‍ത്തനം നിര്‍ത്തലാക്കിയില്ലെങ്കില്‍ പൊയിലൂര്‍ പ്രദേശം ചരിത്രത്തിന്റെ ഭാഗമായി മാറുമെന്നുള്ള ആശങ്കയിലാണ് പ്രദേശവാസികള്‍. വാഴമലയില്‍ മുണ്ടക്കയം ആവര്‍ത്തിക്കാതിരിക്കാന്‍ ആവശ്യമായ നടപടികള്‍ അധികൃതരുടെ ഭാഗത്തുനിന്നും ഉണ്ടാകണമെന്ന് ഗ്രാമപഞ്ചായത്തംഗം സുധാവാസു ആവശ്യപ്പെട്ടു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: