കൊട്ടാരക്കര: ഓയൂരിലെ ആറുവയസുകാരിയെ തട്ടിക്കൊണ്ടുപോയ സംഭവത്തിന്റെ ചുരുളഴിക്കാന് പൊതുജനങ്ങളുടെ സഹായം തേടി പോലീസ്. കുട്ടിയെ തട്ടിക്കൊണ്ടു പോയ വാഹനം തിരിച്ചറിയാനാണ് പോലീസ് സഹായം അഭ്യര്ത്ഥിച്ച് നോട്ടീസ് പുറത്തിറക്കിയത്.
കൊല്ലം റൂറല് പോലീസാണ് നോട്ടീസ് പുറത്തിറക്കിയത്. പ്രതികള് സഞ്ചരിച്ച വാഹനത്തിന്റെ നമ്പര് പ്ലേറ്റ് നിര്മിച്ചവരെ കണ്ടെത്താന് സഹായിക്കണമെന്നാണ് അഭ്യര്ഥന. കെഎല് 04 എഎഫ് 3239 എന്ന രജിസ്ട്രേഷന് നമ്പറുള്ള വാഹനത്തിന്റെ നമ്പര് പ്ലേറ്റ് നിര്മിച്ചവര് പോലീസിനെ വിവരമറിയിക്കണം. ഇതിനായി 9497980211 എന്ന നമ്പരില് ബന്ധപ്പെടണമെന്നും കൊല്ലം റൂറല് പോലീസ് ആവശ്യപ്പെട്ടു.
ഇതേ നമ്പറില് മലപ്പുറത്ത് മറ്റൊരു വാഹനമുള്ളതായി പോലീസ് കണ്ടെത്തിയിരുന്നു. ഈ സാഹചര്യത്തില് കുട്ടിയെ തട്ടിക്കൊണ്ടു പോയ വാഹനത്തിലെ നമ്പര് പ്ലേറ്റ് മറ്റെവിടെയോ തയാറാക്കി ഉപയോഗിച്ചുവെന്നാണ് പോലീസ് കരുതുന്നത്. ഇതു നിര്മിച്ചു നല്കിയവരെ കണ്ടെത്തിയാല് പ്രതികളെ കണ്ടെത്തുന്നതില് നിര്ണായകമാകുമെന്ന കണക്കുകൂട്ടലിന്റെ അടിസ്ഥാനത്തിലാണ് അന്വേഷണ സംഘം ഇത്തരത്തില് നോട്ടീസുമായി രംഗത്തെത്തിയത്.
തട്ടിക്കൊണ്ടു പോയ സംഘത്തിലെ പ്രതികളെക്കുറിച്ച് ഇനിയും കാര്യമായ വിവരങ്ങള് ലഭിക്കാത്ത സാഹചര്യത്തിലാണ് വാഹന നമ്പര് ഉപയോഗിച്ചുള്ള പരിശോധന. ഒന്നിലധികം വാഹനങ്ങള് അക്രമികള് ഉപയോഗിച്ചതായി വ്യക്തമായെങ്കിലും ഇതുവരെ ഒരു വാഹനം പോലും കണ്ടെത്താന് പോലീസിന് സാധിച്ചിട്ടില്ല.
ജന്മഭൂമി ഓണ്ലൈന്