തിരുവനന്തപുരം: ആരോഗ്യപ്രവര്ത്തകരുടെ സംരക്ഷണത്തിനു വേണ്ടി സര്ക്കാര് കൊണ്ടുവരുന്ന ഓര്ഡിനന്സില് ആരോഗ്യപ്രവര്ത്തകര്ക്കെതിരായ വാക്കുകള് കൊണ്ടുള്ള അധിക്ഷേപവും അസഭ്യവും വരെ കുറ്റകൃത്യമാക്കുന്നത് പരിഗണനയില്. ആരോഗ്യപ്രവര്ത്തകര്ക്കെതിരായ അതിക്രമങ്ങളില് ശിക്ഷ ഏഴു വര്ഷം വരെയാക്കി വര്ധിപ്പിച്ചും ഒരു വര്ഷത്തിനുള്ളില് വിചാരണ പൂര്ത്തിയാക്കാന് സമയപരിധി നിശ്ചയിച്ചുമാണ് ഓര്ഡിനന്സ് ഒരുങ്ങുന്നത്. നിയമ വകുപ്പിന്റെ അംഗീകാരം ലഭിച്ചാല് ഓര്ഡിനന്സ് നാളത്തെ മന്ത്രിസഭാ യോഗം പരിഗണിക്കും.
ആരോഗ്യപ്രവര്ത്തകര്ക്കെതിരായ സൈബര് ആക്രമണം വരെ നിയമത്തില്പ്പെടുത്തണമെന്നായിരുന്നു സംഘടനകളുടെ ആവശ്യം. ആരോഗ്യസ്ഥാപനങ്ങളില് ജോലി ചെയ്യുന്ന ആരോഗ്യപ്രവര്ത്തകരില് ഒതുങ്ങിയിരുന്ന നിയമ പരിരക്ഷ നഴ്സിങ് കോളജുകള് ഉള്പ്പടെ ആരോഗ്യമേഖലയിലെ വിദ്യാഭ്യാസ സ്ഥാപനങ്ങളിലേക്കും വ്യാപിപ്പിക്കും. സ്വാശ്രയ കോളജുകള്ക്ക് ഉള്പ്പെടെ നിയമത്തിന്റെ സംരക്ഷണമുണ്ടാകും.
സുരക്ഷാ ജീവനക്കാര്, ക്ലറിക്കല് ജീവനക്കാര്, ശുചീകരണ തൊഴിലാളികള് എന്നിവരെ വരെ നിയമപരിരക്ഷയില് ഉള്പ്പെടുത്തണമെന്ന് ആവശ്യം ഉയര്ന്നിരുന്നു. ഇവരില് ആശുപത്രികളിലെ സുരക്ഷാ ജീവനക്കാരെയും പരിശീലനത്തിന് എത്തുന്നവരെയും ആശുപത്രി സംരക്ഷണ നിയമത്തിന്റെ പരിധിയില് ഉള്പ്പെടുത്താന് ആലോചനയുണ്ട്. അതിക്രമങ്ങള്ക്ക് പരമാവധി ശിക്ഷ മൂന്നില് നിന്ന് ഏഴു വര്ഷമാക്കും. കുറഞ്ഞ ശിക്ഷ ആറു മാസവും. അന്വേഷണം നടത്തി വിചാരണ ഒരു വര്ഷത്തിനുള്ളില് പൂര്ത്തിയാക്കും. ഉപകരണങ്ങള് നശിപ്പിച്ചാല് വിലയുടെ ആറിരട്ടി വരെ നഷ്ടപരിഹാരം ഈടാക്കണമെന്ന നിര്ദേശത്തെക്കുറിച്ചും ചര്ച്ചകള് നടക്കുകയാണ്. നിയമവകുപ്പിന്റെ അംഗീകാരം ലഭിച്ചാലേ മന്തിസഭായോഗത്തിന്റെ അജണ്ടയില് ഉള്പ്പെടുത്തി ഓര്ഡിനന്സിന് അംഗീകാരം നല്കാനാവൂ.
ജന്മഭൂമി ഓണ്ലൈന്