മലപ്പുറം: കരിപ്പൂര്‍ വിമാനത്താവളത്തില്‍ വീണ്ടും വന്‍ സ്വര്‍ണവേട്ട. കസ്റ്റംസിനെ വെട്ടിച്ച് വിമാനത്താവളത്തിന് പുറത്തെത്തിച്ച ഒരു കിലോ സ്വര്‍ണ മിശ്രിതം പോലീസ് പിടികൂടി. ഈ സ്വര്‍ണം കവര്‍ച്ച ചെയ്യാനെത്തിയ കൊടുവള്ളി സ്വദേശിയായ രണ്ടു പേരും പിടിയിലായി.
അബുദാബിയില്‍ നിന്ന് എയര്‍ ഇന്ത്യ എക്‌സ്പ്രസിലാണ് തിരൂര്‍ സ്വദേശി ഷക്കീബ് സ്വര്‍ണം കടത്തിയത്. ഇയാള്‍ വിമാനമിറങ്ങി പുറത്തുവന്നതിന് ശേഷം പാര്‍ക്കിങ് ഏരിയയിലേക്ക് വാഹനം കയറാന്‍ പോകുന്നതിനിടെ ആറോളം പേര്‍ ഷക്കീബുമായി പിടിവലി കൂടുകയായിരുന്നു. ഇതുകണ്ട പുറത്തുണ്ടായിരുന്ന പോലീസ് ഇടപെടുകയായിരുന്നു. തുടര്‍ന്നാണ് ഇവരില്‍ നിന്ന് സ്വര്‍ണം പിടികൂടിയത്. ഇതിനിടെ നാലുപേര്‍ ഓടി രക്ഷപ്പെട്ടു. രാമനാട്ടുകര സ്വര്‍ണകവര്‍ച്ചയ്‌ക്ക് ശേഷം സ്വര്‍ണം കൊള്ളയടിക്കുന്നവരെ സംബന്ധിച്ച് പോലീസ് വിശദമായ അന്വേഷണം നടത്തുന്നുണ്ട്. നിരവധി പേര്‍ തുടര്‍ന്ന് പിടിയിലാവുകയും ചെയ്തിരുന്നു.
പ്രതികരിക്കാൻ ഇവിടെ എഴുതുക