കൊച്ചി: ലക്ഷദ്വീപ് അഡ്മിനിസ്‌ട്രേറ്റര്‍ പ്രഭുല്‍ പട്ടേലിന്റെ ഭരണ നടപടികളുടെ പേരില്‍ ലക്ഷദ്വീപില്‍ ആസൂത്രിത കലാപ നീക്കം. കലാപത്തിന് ആഹ്വാനം ചെയ്യുന്ന ലക്ഷദ്വീപിലെ കോണ്‍ഗ്രസ്-എന്‍സിപി നേതൃത്വത്തിന്റെ ശബ്ദസന്ദേശം പുറത്തുവന്നു.
വര്‍ഗീയ വിദ്വേഷ പ്രചരണം കേരളത്തില്‍ ശക്തമാകുമ്പോഴും ലക്ഷദ്വീപുകാര്‍ ശാന്തരായിരിക്കുന്നത് ചൂണ്ടിക്കാട്ടി അവിടെയും പ്രതിഷേധമുയര്‍ത്തി വീഡിയോ പ്രചരിപ്പിക്കാനാണ് രഹസ്യ സന്ദേശങ്ങളിലൂടെയുള്ള നിര്‍ദേശം. വീഡിയോ കേരളത്തിലെ ചില മാധ്യങ്ങള്‍ക്ക് അയയ്‌ക്കേണ്ടതുണ്ടെന്നും സന്ദേശത്തിലുണ്ട്.
ലക്ഷദ്വീപ് വിഷയത്തെ ബിജെപിക്കെതിരെ തിരിച്ചും, വര്‍ഗീയ വിദ്വേഷ പ്രചരണം നടത്തിയും, കേരളത്തിലെ ഭരണ-പ്രതിപക്ഷ പ്രതിഷേധങ്ങള്‍ സംസ്ഥാന വ്യാപകമായി നടക്കുമ്പോഴും വസ്തുതകള്‍ കൃത്യമായി ബോധ്യമുള്ള ലക്ഷദ്വീപ് ജനത ശാന്തരാണ്. ഇവരെക്കൂടി തെറ്റിദ്ധരിപ്പിച്ച് പ്രതിഷേധത്തിന്റെ ഭാഗമാക്കാനുള്ള അണിയറ നീക്കങ്ങളാണ് ലക്ഷദ്വീപില്‍ സ്വാധീനമുള്ള കോണ്‍ഗ്രസും, എന്‍സിപിയും നടത്തുന്നത്. ഇത്തരത്തില്‍ ആളുകളെ ഇളക്കിവിട്ട് പ്രതിഷേധം സംഘടിപ്പിക്കാന്‍ ഈ പാര്‍ട്ടി നേതൃത്വങ്ങളുടെ മേല്‍ കേരളത്തിലെ പല മാധ്യമപ്രവര്‍ത്തകരും സമ്മര്‍ദ്ദം ചെലുത്തുന്നു. ലക്ഷദ്വീപ് വിഷയം ആളിക്കത്തിക്കുന്ന സംസ്ഥാനത്തെ മാധ്യമങ്ങള്‍ക്ക് നല്‍കാന്‍ 30 മുതല്‍ 50 സെക്കന്‍ഡ് വരെയുള്ള പ്രതിഷേധ വീഡിയോ തയാറാക്കണമെന്നും, ഇതൊരു ലിങ്കിലേക്ക് അയയ്‌ക്കണമെന്നുമാണ് പ്രദേശികമായി പ്രചരിക്കുന്ന ശബ്ദ സന്ദേശം.
ലക്ഷദ്വീപ് ജനതയെ ഒരു തരത്തിലും, ദോഷകരമായി ബാധിക്കാത്തതും, ദ്വീപിന്റെ സമഗ്ര വികസനം ലക്ഷ്യമാക്കിയുമുള്ള ഭരണപരിഷ്‌കാരങ്ങളോടെ ദ്വീപ് ജനതയ്‌ക്ക് യാതൊരു പ്രതിഷേധവുമില്ലാതിരിക്കെയായിരുന്നു കേരളത്തില്‍ ഇടതു-വലതു മുന്നണികള്‍ ജിഹാദി ശക്തികളെ കൂട്ടുപിടിച്ച് വ്യാജ സമൂഹമാധ്യമ പ്രചാരണത്തിലൂടെ തെറ്റിദ്ധാരണകളുണ്ടാക്കിയത്. എസ്ഡിപിഐ, പോപ്പുലര്‍ ഫ്രണ്ട്, വെല്‍ഫെയര്‍ പാര്‍ട്ടി എന്നിവയായിരുന്നു സമരരംഗത്തുണ്ടായിരുന്നത്. സേവ് ലക്ഷദ്വീപ് ഉയര്‍ത്തിയുള്ള വര്‍ഗീയ ഗൂഢനീക്കങ്ങളാണ് പുറത്തുവന്ന ശബ്ദ സന്ദേശങ്ങളിലൂടെ വെളിപ്പെടുന്നത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: