ലണ്ടന്‍: സ്വന്തം തട്ടകമായ ആന്‍ഫീല്‍ഡില്‍ തുടര്‍ച്ചയായ തോല്‍വികള്‍ ഏറ്റുവാങ്ങിയ ലിവര്‍പൂളിന് ഒടുവില്‍ വിജയം. പ്രീമിയര്‍ ലീഗ് പോരാട്ടത്തില്‍ പിന്നില്‍ നിന്ന് പൊരുതിക്കയറിയ ലിവര്‍പൂള്‍ ഒന്നിനെതിരെ രണ്ട് ഗോളുകള്‍ക്ക് ആസ്റ്റണ്‍ വില്ലയെ പരാജയപ്പെടുത്തി. ഇഞ്ചുറി ടൈമിന്റെ ആദ്യ മിനിറ്റില്‍ ട്രെന്റ് അലക്‌സാണ്ടര്‍ -അര്‍നോള്‍ഡ്് നേടിയ ഗോളാണ് ലിവര്‍പൂളിന് വിജയം നേടിക്കൊടുത്തത്.
ആദ്യ പകുതിയുടെ അവസാന നിമിഷങ്ങളില്‍ വാറ്റ്കിന്‍സ് നേടിയ ഗോളില്‍ ആസ്റ്റണ്‍ വില്ല ലീഡ് നേടി. രണ്ടാം പകുതിയുടെ തുടക്കത്തില്‍ ലിവര്‍പൂളിന്റെ മുഹമ്മദ് സല ഗോള്‍ മടക്കി. ഇഞ്ചുറി ടൈമിന്റെ ആദ്യ മിനിറ്റില്‍ അര്‍നോള്‍ഡ് ലക്ഷ്യം കണ്ടതോടെ ലിവര്‍പൂള്‍ വിജയം സ്വന്തമാക്കി.
ഈ വിജയത്തോടെ ലിവര്‍പൂള്‍ 31 മത്സരങ്ങളില്‍ 52 പോയിന്റുമായി അഞ്ചാം സ്ഥാനത്തെത്തി. മറ്റൊരു മത്സരത്തില്‍ ചെല്‍സി ഒന്നിനെതിരെ നാലു ഗോളുകള്‍ക്ക് ക്രിസ്റ്റല്‍ പാലസിനെ തോല്‍പ്പിച്ചു. ചെല്‍സിക്കായി ക്രിസ്റ്റ്യന്‍ പുലിസിച്ച് ഇരട്ട ഗോള്‍ നേടി. ഹാവെര്‍ട്‌സും സൗമയും ഓരോ ഗോള്‍ അടിച്ചു. ബെന്‍ടേക്കാണ് ക്രിസ്റ്റല്‍ പാലസിന്റെ ആശ്വാസ ഗോള്‍ നേടിയത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: