പാരീസ്: രണ്ട് ഗോളിന്റെ ലീഡ് തുലച്ച പാരീസ് സെന്റ് ജര്‍മന് (പിഎസ്ജി) തോല്‍വി. ലീഗ് വണ്ണില്‍ മൊണാക്കോ രണ്ടിനെതിരെ മൂന്ന് ഗോളുകള്‍ക്ക് പിഎസ്ജിയെ അട്ടിമറിച്ചു.
ആദ്യ പകുതിയില്‍ സ്‌ട്രൈക്കര്‍ കിലിയന്‍ എംബാപ്പെയുടെ ഇരട്ട ഗോളിന് പിഎസ്ജി 2-0 ന് മുന്നില്‍ എത്തി. എന്നാല്‍ പൊരുതിക്കളിച്ച മൊണാക്കോ കെവിന്‍ വോളാന്‍ഡിന്റെ ഇരട്ട ഗോളില്‍ പിഎസ്ജിക്ക് ഒപ്പം എത്തി. കളിയവസാനിക്കാന്‍ ആറു മിനിറ്റ് ശേഷിക്കെ സെസ് ഫാബ്രീഗസ് പെനാല്‍റ്റി,ഗോളാക്കി മൊണാക്കോയ്‌ക്ക്് വിജയം സമ്മാനിച്ചു.
ചാമ്പ്യന്‍സ് ലീഗില്‍ ആര്‍.ബി ലീപ്‌സിഗിനെ നേരിടാനിരിക്കെയാണ് പിഎസ്ജി അപ്രതീക്ഷിത തോല്‍വി ഏറ്റുവാങ്ങിയത്. മൊണോക്കോയോട് തോറ്റെങ്കിലും പോയിന്റ് നിലയില്‍ പിഎസ്ജിയാണ് മുന്നില്‍. പതിനൊന്ന് മത്സരങ്ങളില്‍ അവര്‍ക്ക്് ഇരുപത്തിനാല് പോയിന്റുണ്ട്. ഈ വിജയത്തോടെ മൊണാക്കോ പതിനൊന്ന് മത്സരങ്ങളില്‍ ഇരുപത് പോയിന്റുമായി രണ്ടാം സ്ഥാനത്തെത്തി.
ഒക്‌ടോബര്‍ മുപ്പത്തിയൊന്നിന് നാന്റസിനെതിരായ മത്സരത്തിനിടെ പരിക്കേറ്റതിനുശേഷം ആദ്യമായി കളിക്കളത്തിലിറങ്ങിയ എംബാപ്പെ 25-ാം മിനിറ്റില്‍ ആദ്യ ഗോള്‍ നേടി. പന്ത്രണ്ട് മിനിറ്റുകള്‍ക്ക് ശേഷം രണ്ടാം ഗോളും കുറിച്ചു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: