അക്കിത്തം വിടവാങ്ങിയതോടെ സാഹിത്യ ലോകത്തിന് ഉണ്ടായിരിക്കുന്നത് തീരാ നഷ്ടമാണ്. സ്‌നേഹ വസന്തം നിറച്ചുള്ള വരികള്‍ ഇനിയില്ല എന്നത് നമ്മുടെ മനസ്സിനെ പഠിപ്പിക്കേണ്ടിയിരിക്കുന്നു.
പാലക്കാട് ജില്ലയിലെ കുമരനല്ലൂരില്‍ 1926 മാര്‍ച്ച് 18 നായിരുന്നു മഹാകവി അക്കിത്തം അച്യുതന്‍ നമ്പൂതിരിയുടെ ജനനം. അക്കിത്തം വാസുദേവന്‍ നമ്പൂതിരിയും ചേകൂര്‍ പാര്‍വ്വതി അന്തര്‍ജനവുമായിരുന്നു മാതാപിതാക്കള്‍. പന്ത്രണ്ട് വയസ്സുവരെ പിതാവില്‍ നിന്നും ഋഗ്വേദവും കൊടക്കാട്ട് ശങ്കുണ്ണി നമ്പീശനില്‍ നിന്നും സംസ്‌കൃതം, ജ്യോതിഷം എന്നിവയും പഠിച്ചു. മാവറെ അച്യുതവാരിയരായിരുന്നു ആദ്യ ഗുരു. തൃക്കണ്ടിയൂര്‍ കളത്തില്‍ ഉണ്ണികൃഷ്ണ മേനോനിന്‍ നിന്ന് ഇംഗ്ലീഷ്, കണക്ക് എന്നിവ അഭ്യസിക്കുമ്പോള്‍ പ്രായം 14.
ടി.പി. കുഞ്ഞുകുട്ടന്‍ നമ്പ്യാരില്‍ നിന്നും കളിദാസകവിതയും വി.ടി. ഭട്ടതിരിപ്പാടില്‍ നിന്നും തമിഴും പഠിച്ചു. കുമരനല്ലൂര്‍ ഗവണ്‍മെന്റ് ഹൈസ്‌കൂള്‍ വിദ്യാഭ്യാസത്തിന് ശേഷം കോഴിക്കോട് സാമൂതിരി കോളേജില്‍ ഇന്റര്‍മീഡിയറ്റിന് ചേര്‍ന്നു. പക്ഷേ പഠനം പൂര്‍ത്തിയാക്കിയില്ല.
കവിത രചിക്കാന്‍ തുടങ്ങിയത് എട്ടാം വയസ്സില്‍. സാഹിത്യകാരന്മാരായിരുന്ന ഇടശ്ശേരി ഗോവിന്ദന്‍ നായര്‍, ബാലാമണിയമ്മ, നാലപ്പാടന്‍, കുട്ടികൃഷ്ണമാരാര്‍, വി.ടി., എംആര്‍ബി( മുല്ലമംഗലത്ത് രാമന്‍ ഭട്ടതിരി) എന്നിവര്‍ക്കൊപ്പമുള്ള സഹവാസവും ശിഷ്യത്വവും അക്കിത്തത്തിലെ കവിഭാവന ഉണര്‍ത്തി.
1946 മുതല്‍ 49 വരെ ഉണ്ണി നമ്പൂതിരി മാസികയുടെ പ്രസാധകനായിരുന്നു. യോഗക്ഷേമം ആഴ്ചപ്പതിപ്പ്, മംഗളോദയം മാസിക എന്നിവയുടെ ഡപ്യൂട്ടി എഡിറ്ററുമായിരുന്നു. 1956 മുതല്‍ 1985 വരെ ആകാശവാണിയുടെ കോഴിക്കോട്, തൃശൂര്‍ നിലയങ്ങളില്‍ സേവനമനുഷ്ഠിച്ചു. എഡിറ്റര്‍ പോസ്റ്റില്‍ നിന്നും 1985 ല്‍ വിരമിച്ചു.
1949 ല്‍ 23-ാം വയസ്സില്‍ പട്ടാമ്പി ആലമ്പിള്ളി മനയിലെ ശ്രീദേവി അന്തര്‍ജനത്തെ വിവാഹം ചെയ്തു. 2019 മെയില്‍ ഇവര്‍ അന്തരിച്ചു. പാര്‍വ്വതി, ഇന്ദിര, വാസുദേവന്‍, ശ്രീജ, ലീല, നാരായണന്‍ എന്നിവരാണ് മക്കള്‍. പ്രശസ്ത ചിത്രകാരനും ശില്‍പിയുമായ അക്കിത്തം നാരായണന്‍ സഹോദരനാണ്.
കവിതകളും നാടകവും ചെറുകഥകളും ഉപന്യാസങ്ങളുമായി 46 ഓളം കൃതികള്‍ മഹാകവി അക്കിത്തത്തിന്റെ സംഭാവനയായി മലയാളത്തിന് ലഭിച്ചിട്ടുണ്ട്. ഇരുപതാം നൂറ്റാണ്ടിന്റെ ഇതിഹാസം, ഭാഗവതം, നിമിഷ ക്ഷേത്രം, വെണ്ണക്കല്ലിന്റെ കഥ, ബലിദര്‍ശനം, മനസ്സാക്ഷിയുടെ പൂക്കള്‍, അക്കിത്തത്തിന്റെ തെരഞ്ഞെടുത്ത കവിതകള്‍, നിമിഷ ക്ഷേത്രം, പഞ്ചവര്‍ണ്ണക്കിളി, അരങ്ങേറ്റം, മധുവിധു, ഒരു കുല മുന്തിരിങ്ങ, ഇടിഞ്ഞു പൊളിഞ്ഞ ലോകം, അമൃതഗാഥിക, കളിക്കൊട്ടിലില്‍, സമത്വത്തിന്റെ ആകാശം, കരതലാമലകം, ആലഞ്ഞാട്ടമ്മ, പ്രതികാരദേവത, മധുവിധുവിനു ശേഷം, സ്പര്‍ശമണികള്‍, അഞ്ചു നാടോടിപ്പാട്ടുകള്‍, മാനസപൂജ എന്നിവയാണ് പ്രധാനകൃതികള്‍. ഉപനയനം, സമാവര്‍ത്തനം എന്നീ ഉപന്യാസങ്ങളും അദ്ദേഹത്തിന്റേതായി പുറത്തുവന്നിട്ടുണ്ട്.
ബലിദര്‍ശനം എന്നകൃതിക്ക് 1972 ല്‍ കേരള സാഹിത്യഅക്കാദമി അവാര്‍ഡ് ലഭിച്ചു. 1973 ലെ കേന്ദ്രസാഹിത്യ അക്കാദമി അവാര്‍ഡ്, 1974 ലെ ഓടക്കുഴല്‍ അവാര്‍ഡ്, സഞ്ജയന്‍ പുരസ്‌കാരം, പത്മപ്രഭ പുരസ്‌കാരം, അമൃതകീര്‍ത്തി പുരസ്‌കാരം, സമഗ്രസംഭാവനയ്‌ക്കുള്ള 2008 ലെ എഴുത്തച്ഛന്‍ പുരസ്‌കാരം, 2012ലെ വയലാര്‍ അവാര്‍ഡ്, 2016ലെ എഴുത്തച്ഛന്‍ പുരസ്‌കാരം, 2017ലെ പത്മശ്രീ പുരസ്‌കാരം, ജ്ഞാനപീഠ സമിതിയുടെ മൂര്‍ത്തിദേവി പുരസ്‌കാരം തുടങ്ങിയവ മഹാകവി അക്കിത്തത്തിന് ലഭിച്ചിട്ടുണ്ട്.
2019 ലെ ജ്ഞാനപീഠ പുരസ്‌കാരം അക്കിത്തത്തിന് വൈകി കിട്ടിയ അംഗീകാരമായിരുന്നു. ജ്ഞാനപീഠം നേടുന്ന ആറാമത്തെ മലയാളി എഴുത്തുകാരനാണ് അക്കിത്തം. കൊറോണയുടെ പശ്ചാത്തലത്തില്‍ അദ്ദേഹത്തിന്റെ വീട്ടില്‍ വെച്ച് സംഘടിപ്പിച്ച ലളിതമായ ചടങ്ങിലാണ് ജ്ഞാനപീഠ പുരസ്‌കാരം അദ്ദേഹത്തിന് നല്‍കിയത്. അത് നല്‍കി ദിവസങ്ങള്‍ക്കുള്ളില്‍ തന്നെ അക്കിത്തം ഇഹലോക വാസം വെടിയുകയായിരുന്നു.
പ്രതികരിക്കാൻ ഇവിടെ എഴുതുക