നായാട്ടു സംഘത്തിൽപ്പെട്ട ഒരാൾ വെടിയേറ്റ് മരിച്ചു

കണ്ണൂർ : എടപ്പുഴ വനത്തോട് ചേർന്ന മിച്ചഭൂമിയിൽ നായാട്ടു സംഘത്തിൽ ഒരാൾ വെടിയേറ്റ് മരിച്ചു. എടൂർ കമ്പനി നിരത്ത് സ്വദേശി പുലുക്കി പി.ആർ. മോഹനൻ (52 )ആണ് മരിച്ചത്. ഇയാൾക്കൊപ്പം ഉണ്ടായിരുന്ന ആളെ തോക്കുസഹിതം കരിക്കോട്ടക്കരി പോലീസ് അറസ്റ്റ് ചെയ്തു.

നായാട്ടിനായി പോയ രണ്ടുപേരിൽ ഒരാൾ ആണ് മരിച്ചത്. സംഭവത്തിൽ ദുരൂഹതയുണ്ട്. തോക്കുമായി മരത്തിൽ കയറി വെടിക്കായി ഒരുങ്ങുന്നതിനിടെ കാൽ തെറ്റി താഴെ വീണപ്പോൾ  വെടി പൊട്ടിപരിക്കേൽക്കുകയായിരുന്നു എന്നാണ് നിഗമനം. ഇയാളുടെ കാൽ മുട്ട് വെടിയേറ്റ് തകർന്ന നിലയിലാണ്.  കൂടെ ഉണ്ടായിരുന്ന ആളെ പോലീസ് ചോദ്യം ചെയ്തു വരികയാണ്.  

ജനവാസ മില്ലാത്ത സ്ഥലത്തു വെച്ചായിരുന്നു സംഭവം . സംഭവശേഷം നാട്ടുകാരെ കൂടെഉണ്ടായിരുന്ന  ആൾ വിവരമറിയിക്കുകയായിരുന്നു. ഉൾവനത്തിൽ നിന്നും മോഹനനെ പുറത്തു എത്തിക്കുന്നതിന് മണിക്കൂറുകളോളമാണ് എടുത്തത്. ഇതിനിടെ ചോരവാർന്നാണ് ഇയാൾ  മരിച്ചത്. മൃതദേഹം പോസ്റ്റ് മോർട്ടത്തിനായി പരിയാരം ഗവ. മെഡിക്കൽ കോളേജിലേക്ക് മാറ്റി.

ഭാര്യ : സിന്ധു. മക്കൾ: ഷിജിന, സുദിന, അമൽ.