തിരുവനന്തപുരം: ക്ഷേത്ര പൂജാരിയുടെ ആത്മഹത്യയില് വിറളി പൂണ്ട് കഴക്കൂട്ടം നിയോജക മണ്ഡലത്തിലെ എല്ഡിഎഫ് സ്ഥാനാര്ത്ഥി കടകംപള്ളി സുരേന്ദ്രന്. ഇന്നലെ രാവിലെ മുതല് വിവിധ ക്ഷേത്രങ്ങളില് ദര്ശനം നടത്തി ഞാന് വിശ്വാസിയാണെന്ന് വരുത്തി തീര്ക്കുകയായിരുന്നു. വീടിന് സമീപത്തെ ക്ഷേത്രത്തില് പോയി ദര്ശനം നടത്തി പൂജാരിയില് നിന്ന് തീര്ത്ഥം വാങ്ങി സേവിച്ച് പ്രസാദവും വാങ്ങി. തുടര്ന്ന് പൂജാരി ആത്മഹത്യ ചെയ്ത മുല്ലൂര് ശ്രീഭദ്രകാളി ക്ഷേത്രത്തില് എത്തി സമീപത്തെ സിപിഎമ്മുകാരുടെ വീട്ടിലെത്തി.
ക്ഷേത്ര ദര്ശനത്തിന് പോകുന്ന വനിതകളെ കണ്ട് തനിക്ക് അനൂകൂലമായി പറയിപ്പിച്ച ശബ്ദ സന്ദേശങ്ങള് റെക്കാര്ഡ് ചെയ്ത് പ്രചരിപ്പിച്ച ശേഷം വാര്ത്താസമ്മേളനവും നടത്തി. താങ്കളുടെ പ്രവൃത്തിയില് മനംനൊന്താണ് പൂജാരി ആത്മഹത്യ ചെയ്തതെന്ന് മറ്റൊരു പൂജാരിയും കമ്മിറ്റി അംഗവും പറഞ്ഞല്ലോയെന്ന ചോദ്യത്തിന് അവരൊക്കെ ബിജെപിക്കാരെന്നായിരുന്നു മറുപടി. താന് തികഞ്ഞ വിശ്വാസിയാണ്, ക്ഷേത്രങ്ങളില് പോകാറുണ്ട്. അമ്മ പഠിപ്പിച്ചതനുസരിച്ച് തീര്ത്ഥം വാങ്ങി സേവിക്കുകയും ബാക്കി തലയില് തളിക്കാറുമുണ്ട്. ഭദ്രകാളിയോടാണ് ചിലര് കളിക്കുന്നത്. അവര് അനുഭവിക്കുക തന്നെ ചെയ്യുമെന്നും കടകംപള്ളി പറഞ്ഞു.
ഇതേ കടകംപള്ളിയാണ് ആറ്റുകാല് പൊങ്കാല ഉത്സവത്തിന് പണ്ടാര അടുപ്പില് തീ പകരുന്ന ചടങ്ങില് മറ്റുള്ളവരെല്ലാം കൈകൂപ്പി നിന്നപ്പോള് കൈയും കെട്ടി നോക്കി നിന്നത്. ആനയറ മുല്ലൂര് ശ്രീഭദ്രകാളി ക്ഷേത്രത്തിലെ പൂജാരി ആനയറ ഇരുപ്പുകുഴി നിവാസി വിഷ്ണു കഴിഞ്ഞ ദിവസം ക്ഷേത്ര കമ്മറ്റി ഓഫീസില് തൂങ്ങി മരിച്ചു. ക്ഷേത്ര ദര്ശനത്തിന് എത്തിയ കടകംപള്ളി പൂജാരി നല്കിയ തീര്ത്ഥം വാങ്ങിയ ശേഷം സേവിക്കാതെ കളഞ്ഞു. വിശ്വാസം ഇല്ലെങ്കില് എന്തിന് തീര്ത്ഥം വാങ്ങിയെന്ന് പൂജാരി ചോദിക്കുകയും ഇത് കടകംപള്ളി ക്ഷേത്ര കമ്മിറ്റിക്കാരോട് പരാതിപ്പെട്ടതനുസരിച്ച് പ്രധാന പൂജകളില് നിന്ന് പൂജാരിയെ മാറ്റി നിര്ത്തിയെന്നുമാണ് ആരോപണം. പൂജകളില് നിന്നും മാറ്റി നിര്ത്തിയതില് മനംനൊന്താണ് ആത്മഹത്യ ചെയ്തതെന്നാണ് കടകംപള്ളിക്കെതിരെ ഉയര്ന്ന ആരോപണം. ഇതില് പ്രദേശത്ത് വ്യാപക പ്രതിഷേധം ഉയരുകയും ഹൈന്ദവ കൂട്ടായ്മയുടെ പ്രതിഷേധവും നടന്നിരുന്നു. തെരഞ്ഞെടുപ്പില് തനിക്ക് തിരിച്ചടിയാകുമെന്ന് ഭയന്നാണ് കടകടംപള്ളി പൊടുന്നനെ വിശ്വാസിയായത്.
