തിരുവനന്തപുരം: സംസ്ഥാനത്ത് ഗാര്ഹിക എല്പിജി, പെട്രോള്, ഡീസല് എന്നിവയുടെ വിതരണത്തില് യാതൊരു പ്രതിസന്ധിയും നിലവിലില്ലെന്ന് സിവില് സപ്ലൈസ് കമ്മിഷണര് അറിയിച്ചു. കൊമേഴ്സ്യല് എല്പിജി വിതരണവുമായി ബന്ധപ്പെട്ട ചില നിയന്ത്രണങ്ങള് ഏര്പ്പെടുത്തിയിട്ടുണ്ട് എന്നതല്ലാതെ വിതരണത്തില് തടസങ്ങള് ഒന്നും ഇല്ല.
മാര്ച്ച് 29ലെ സര്ക്കാര് നിര്ദേശത്തിന്റെ അടിസ്ഥാനത്തില് സംസ്ഥാനത്തെ സെമി എസന്ഷ്യല് വിഭാഗത്തില് ഉള്പ്പെടുന്ന ഫാര്മസ്യൂട്ടിക്കല് റെയില്വേ കാറ്ററിങ് അടക്കമുള്ള സ്ഥാപനങ്ങള്ക്ക് അവരുടെ ആവശ്യകതയുടെ 100 ശതമാനം ആയി എല്പിജി വിതരണം വര്ദ്ധിപ്പിച്ചും, ഹോട്ടല്, റസ്റ്റോറന്റ്, ഇന്ഡസ്ട്രിയല് ബേസ്ഡ് സര്വീസുകളില് ഉള്പ്പെടുന്ന സ്ഥാപനങ്ങള്ക്ക് അവരുടെ ആകെ ആവശ്യകതയുടെ 62 ശതമാനം എല്പിജി വിതരണം നടത്താനും നിര്ദേശങ്ങള് നല്കിയിട്ടുണ്ട്.
സംസ്ഥാനത്തിന്റെ ആകെ ശരാശരി എല്പിജി ഉപഭോഗം 753.01എംടി ആയിരുന്നു, നിലവില് 496.99 എംടി (ആകെ ആവശ്യകതയുടെ 66 ശതമാനം) വിതരണം നടത്താന് നടപടികള് സ്വീകരിച്ചിട്ടുണ്ട്. ഗ്യാസ് വിതരണവുമായി ബന്ധപ്പെട്ട് പൊതുജനങ്ങള്ക്കുള്ള പരാതികള് അറിയിക്കുന്നതിന് എല്ലാ താലൂക്കിലും എല്പിജി കണ്ട്രോള് റൂമുകള് ആരംഭിച്ചിട്ടുണ്ട്. താലൂക്ക്, ജില്ലാതല കണ്ട്രോള് റൂമുകളുടെ ഫോണ് നമ്പറുകള് പൊതുവിതരണ ഉപഭോക്തൃകാര്യ വകുപ്പിന്റെ ഫേസ്ബുക്ക്, ഇന്സ്റ്റാഗ്രാം തുടങ്ങിയ സോഷ്യല് മിഡിയ പേജുകളില് ലഭ്യമാണ്. സംസ്ഥാന വാര് റൂം ടോള്ഫ്രീ നമ്പര്: 18004250290.
