ടെഹ്റാൻ : ഇസ്രായേലിനെതിരെ വിക്ഷേപിച്ച മിസൈലുകളിൽ “ഇന്ത്യയിലെ ജനങ്ങൾക്ക്” നന്ദി പറഞ്ഞ് ഇറാൻ സൈന്യത്തിന്റെ സന്ദേശങ്ങൾ . മുംബൈയിലെ ഇറാൻ കോൺസുലേറ്റ് ജനറലും ഇറാനിയൻ സ്റ്റേറ്റ് മീഡിയയുമാണ് ഇതിന്റെ ദൃശ്യങ്ങൾ ഓൺലൈനിൽ പങ്ക് വച്ചത്. ദൃശ്യങ്ങളിൽ, വിക്ഷേപിക്കുന്നതിന് മുമ്പ് നീല മാർക്കറുകൾ ഉപയോഗിച്ച് മിസൈലുകളിൽ “ഇന്ത്യയിലെ ജനങ്ങൾക്ക് നന്ദി” എന്നെഴുതിയ കുറിപ്പുകൾ ഇറാൻ എയ്റോസ്പേസ് ഫോഴ്സിലെ ഉദ്യോഗസ്ഥർ ആലേഖനം ചെയ്യുന്നത് കാണാം.
സ്പെയിൻ, പാകിസ്ഥാൻ, ജർമ്മനി എന്നിവിടങ്ങളിലെ ജനങ്ങൾക്ക് നന്ദി പറയുന്ന സമാനമായ സന്ദേശങ്ങളും ചില മിസൈലുകളിൽ എഴുതിയിട്ടുണ്ട്. ഇറാനോട് അനുഭാവം പുലർത്തുന്ന രാജ്യങ്ങളോട് കൂടുതൽ വിശാലമായ സമീപനം സ്വീകരിക്കുന്നതിന്റെ സൂചനയാണ്.ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) നടത്തിയ ഓപ്പറേഷൻ ട്രൂ പ്രോമിസ് 4 ന്റെ ഭാഗത്ത് അയച്ച മിസൈലിലാണ് വിവിധ രാജ്യങ്ങൾക്ക് നന്ദി പറയുന്നത് .
മേഖലയിലുടനീളമുള്ള പ്രധാന അമേരിക്കൻ, ഇസ്രായേലി സൈനിക ആസ്തികളെ ലക്ഷ്യമിട്ടാണ് ഓപ്പറേഷൻ ട്രൂ പ്രോമിസ് നടത്തുന്നതെന്ന് ഐആർജിസി ഔദ്യോഗിക പ്രസ്താവനയിൽ പറഞ്ഞു. ആഷ്ഡോഡിലെ എണ്ണ സംഭരണ സൗകര്യങ്ങൾ, സൈനിക സൈറ്റുകൾ, യുഎസ് സൈനിക വിവര വിനിമയ കേന്ദ്രം തുടങ്ങിയ അടിസ്ഥാന സൗകര്യങ്ങൾ ഇതിൽ ഉൾപ്പെടുന്നുവെന്ന് പ്രസ് ടിവി റിപ്പോർട്ടിൽ പറയുന്നു.
അൽ-ദഫ്ര, അൽ-ഉദൈരി എന്നിവിടങ്ങളിലെ അമേരിക്കൻ താവളങ്ങൾക്കും അലി അൽ-സലേം വ്യോമതാവളത്തിനും ഷെയ്ഖ് ഇസ ബേസിനും നേരെയുള്ള ആക്രമണങ്ങളും പ്രസ്താവനയിൽ പട്ടികപ്പെടുത്തിയിട്ടുണ്ട്. സംഘർഷത്തിനിടെ ഇന്ത്യയുമായുള്ള ഊഷ്മളമായ ബന്ധം എടുത്തുകാണിക്കുന്ന സമീപകാല സംഭവവികാസങ്ങളുടെ പശ്ചാത്തലത്തിലാണ് ഇന്ത്യയെക്കുറിച്ചുള്ള പരാമർശം.
അമേരിക്കയുമായും സഖ്യകക്ഷികളുമായും ബന്ധപ്പെട്ട കപ്പലുകൾക്ക് നിയന്ത്രണങ്ങൾ നിലനിൽക്കുന്നുണ്ടെങ്കിലും, തന്ത്രപരമായി നിർണായകമായ ഹോർമുസ് കടലിടുക്കിലൂടെ ഇന്ത്യൻ കപ്പലുകൾക്ക് പോകാൻ ഇറാൻ അനുമതി നൽകിയിരുന്നു.”സൗഹൃദ”മായി കണക്കാക്കപ്പെടുന്ന ചുരുക്കം ചില രാജ്യങ്ങളിൽ ഇന്ത്യയും ഉൾപ്പെടുന്നുവെന്ന് ഇറാൻ വിദേശകാര്യ മന്ത്രി അബ്ബാസ് അരഗ്ചി പറഞ്ഞിരുന്നു.
