ബെംഗളൂരു: പശ്ചിമേഷ്യയിലെ സംഘർഷം മൂലം എൽപിജി ക്ഷാമം ഉണ്ടാകുമെന്ന ആശങ്കകൾക്കിടയിൽ, യുഎസിൽ നിന്ന് എൽപിജി വഹിച്ചുകൊണ്ടുള്ള കപ്പൽ ഇന്ത്യയിലെത്തി. ടെക്സസിലെ നെദർലാൻഡ് തുറമുഖത്ത് നിന്ന് എൽപിജി വഹിച്ചുകൊണ്ട് പൈക്സിസ് പയനിയർ എന്ന ചരക്ക് കപ്പലാണ് ഞായറാഴ്ച രാവിലെ ന്യൂ മംഗലാപുരം തുറമുഖത്ത് എത്തിയത്.
ന്യൂ മാംഗ്ലൂർ തുറമുഖ അതോറിറ്റിയുടെ ഡെയ്ലി വെസൽ പൊസിഷൻ അനുസരിച്ച്, 47,236 ടൺ മൊത്തം ടൺ ഭാരമുള്ള സിംഗപ്പൂർ പതാകയുള്ള ടാങ്കർ രാവിലെ 6 മണിയോടെ ബെർത്ത് നമ്പർ 13 ൽ നങ്കൂരമിട്ടത്. ഫെബ്രുവരി 14 ന് ടെക്സസിലെ നെദർലാൻഡ് തുറമുഖത്ത് നിന്നാണ് കപ്പൽ പുറപ്പെട്ടത്. തിങ്കളാഴ്ച പുലർച്ചെ തുറമുഖത്ത് ഏജിസ് ലോജിസ്റ്റിക്സ് ലിമിറ്റഡിലേക്ക് 16,714 ടൺ എൽപിജി ഡിസ്ചാർജ് ചെയ്യാനിരിക്കുകയാണ്.
അതേ സമയം തന്നെ പശ്ചിമേഷ്യയിൽ മൂന്നാഴ്ച നീണ്ടുനിന്ന യുദ്ധം ഇന്ത്യയിലേക്കുള്ള ഊർജ്ജ വിതരണത്തെ സാരമായി തടസ്സപ്പെടുത്തിയിട്ടുണ്ട്. ഇത് ഹോട്ടലുകൾ പോലുള്ള വാണിജ്യ സ്ഥാപനങ്ങളിലേക്കുള്ള എൽപിജി വിതരണത്തിൽ വെട്ടിക്കുറവിന് കാരണമായിട്ടുണ്ട്.
