പാലക്കാട് : ഒറ്റപ്പാലം ത്രാങ്ങാലിയില്‍ വീട്ടില്‍ നിന്നും മോഷണം പോയെന്ന് കരുതിയിരുന്ന 63 സ്വര്‍ണം വീട്ടില്‍ നിന്ന് തന്നെ കണ്ടെത്തി. വീട്ടിലെ കിടപ്പു മുറിയിലെ ഇരുമ്പ് അലമാരയില്‍ നിന്നാണ് സ്വര്‍ണം ഭദ്രമായി കണ്ടെത്തിയത്.അലമാരയിലെ പ്രത്യേക അറയില്‍ സൂക്ഷിച്ച നിലയിലായിരുന്നു സ്വര്‍ണം.
മാന്നനൂര്‍ ത്രാങ്ങാലി സ്വദേശി ബാലകൃഷ്ണന്റെ വീട്ടിലാണ് മോഷണം നടന്നെന്ന പരാതി ഉയര്‍ന്നത്. ചെന്നൈയിലുള്ള ബാലകൃഷ്ണന്റെ ഭാര്യയെ വിളിച്ചു സംസാരിച്ചതിന് പിന്നാലെയാണ് സ്വര്‍ണം കണ്ടെടുത്തത്.
എന്നാല്‍ ഒരു ലക്ഷം രൂപയും വില പിടിപ്പുള്ള വാച്ചും നഷ്ടപ്പെട്ടിട്ടുണ്ട്. വീട് കുത്തിത്തുറന്ന് 63 പവന്‍ സ്വര്‍ണവും ഒരു ലക്ഷം രൂപയും മോഷ്ടിച്ചെന്നാണ് ആദ്യം പരാതി ഉണ്ടായത്. ബാലകൃഷ്ണനും കുടുംബവും വീട്ടിലില്ലാതിരുന്ന സമയത്താണ് മോഷണം നടന്നത്. വീടിന്റെ മുകള്‍ നിലയിലെ വാതില്‍ കുത്തിത്തുറന്നാണ് താഴെ കിടപ്പുമുറിയില്‍ സൂക്ഷിച്ചിരുന്ന സ്വര്‍ണവും പണവും കവര്‍ന്നതെന്നായിരുന്നു പരാതി.
ഒറ്റപ്പാലം പൊലീസ് കേസെടുത്ത് അന്വേഷണം നടത്തവെയാണ് സ്വര്‍ണം നഷ്ടപ്പെട്ടിട്ടില്ലെന്ന് വ്യക്തമായത്.
പ്രതികരിക്കാൻ ഇവിടെ എഴുതുക: