കോഴിക്കോട്: മെഡിക്കല്‍ കോളേജ് ഐസിയു പീഡനക്കേസ് അതിജീവിത സിറ്റി പൊലീസ് കമ്മീഷണര്‍ ഓഫീസിന് മുന്നില്‍ നടത്തി വന്ന സമരം അവസാനിപ്പിച്ചു. മെഡിക്കല്‍ കോളേജ് ആശുപത്രിയിലെ ഗൈനക്കോളജിസ്റ്റ് ഡോ. പ്രീതിക്കെതിരായ അന്വേഷണ റിപ്പോര്‍ട്ടിന്റെ പകര്‍പ്പ് കൈമാറാമെന്ന് രേഖാമൂലം ഉറപ്പ് ലഭിച്ചതിനെ തുടര്‍ന്നാണ് 13 ദിവസമായി നടത്തി വന്ന സമരം അവസാനിപ്പിച്ചത്.
എത്രയും പെട്ടെന്ന് റിപ്പോര്‍ട്ടിന്റെ പകര്‍പ്പ് കൈമാറാന്‍ ഉത്തരമേഖല ഐജി കെ സേതുരാമന്‍, കോഴിക്കോട് സിറ്റി പൊലീസ് കമ്മീഷണര്‍ക്ക് നിര്‍ദ്ദേശം നല്‍കി. റിപ്പോര്‍ട്ടിന്റെ പകര്‍പ്പ് കൈമാറുന്നതില്‍ തെറ്റില്ലെന്ന നിയമോപദേശം കണക്കിലെടുത്തായിരുന്നു ഐ ജിയുടെ നടപടി.
സമരം അവസാനിപ്പിച്ചതിന് പിന്നാലെ ഡോക്ടര്‍ പ്രീതിക്കെതിരെ മെഡിക്കല്‍ കോളേജ് എസിപി നടത്തിയ അന്വേഷണ റിപ്പോര്‍ട്ടിന്റെ പകര്‍പ്പ് അതിജീവിതയ്‌ക്ക് നല്‍കി. ഇത് പരിശോധിച്ച ശേഷം ആവശ്യമെങ്കില്‍ നിയമ പോരാട്ടം തുടരുമെന്ന് അതിജീവിത വ്യക്തമാക്കി.
പ്രതികരിക്കാൻ ഇവിടെ എഴുതുക: