കൊല്ലം: ഭാര്യയെയും രണ്ട് കുഞ്ഞുങ്ങളെയും വിഷം കുത്തിവെച്ച് കൊന്ന കേസില്‍ പ്രതിയുടെ ശിക്ഷ ഇന്ന് വിധിക്കും. കേസിലെ പ്രതി മണ്‍ട്രോത്തുരുത്ത് പെരുങ്ങാലം എറോപ്പില്‍ വീട്ടില്‍ അജി (എഡ്വേഡ് -42) കുറ്റക്കാരനാണെന്ന് കോടതി കണ്ടെത്തിയിരുന്നു. കൊല്ലം നാലാം അഡീ. സെഷന്‍സ് കോടതിയാണ് ശിക്ഷ വിധിക്കുക.
2021 മേയ് 11 നാണ് കേസിനാസ്പദമായ സംഭവം നടന്നത്. ഭാര്യ വര്‍ഷ (26), മക്കളായ അലന്‍ (2), ആരവ് (3 മാസം) എന്നിവരെ കേരളപുരം ഇടവട്ടത്തെ വീട്ടില്‍വെച്ച് എഡ്വേഡ് വിഷം കുത്തിവച്ചു കൊലപ്പെടുത്തിയെന്നാണ് കേസ്. മെഡിക്കല്‍ സ്റ്റോര്‍ ജീവനക്കാരനായിരുന്ന എഡ്വേഡ് അനസ്തേഷ്യക്കു മുമ്പ് നല്‍കുന്ന മരുന്ന് കുത്തിവച്ചാണ് ഭാര്യയെയും മക്കളെയും കൊന്നത്. മൂന്നു മാസം പ്രായമുള്ള കുഞ്ഞുമായി വീടിന് സമീപം നിന്ന വര്‍ഷയെ തള്ളി താഴെയിടുകയും വീഴ്ചയില്‍ തലയ്‌ക്ക് പരിക്കേറ്റ് അബോധാവസ്ഥയിലായ ഇവരെ മുറിയിലെത്തിച്ച ശേഷം മൂന്നുപേരെയും മരുന്ന് കുത്തിവയ്‌ക്കുകയുമായിരുന്നു.
സംശയരോഗത്തെ തുടര്‍ന്നായിരുന്നു കൊലപാതകം. മുറിയില്‍ അബോധാവസ്ഥയില്‍ അഭിനയിച്ചു കിടന്ന എഡ്വേഡിനെ ആശുപത്രിയില്‍ പ്രവേശിപ്പിച്ചിരുന്നെങ്കിലും പരിശോധനയില്‍ വ്യാജമാണെന്ന് തെളിയുകയായിരുന്നു. തുടര്‍ന്നാണ് പ്രതി കുറ്റസമ്മതം നടത്തിയത്. അന്ന് 5 വയസുണ്ടായിരുന്ന മൂത്ത മകള്‍ക്ക് മരുന്ന് കുത്തിവച്ചിരുന്നില്ല. അവള്‍ സ്വയം ജീവിച്ചോളും, അതുകൊണ്ടാണ് കൊല്ലാതിരുന്നതെന്നാണ് പ്രതി നല്‍കിയ മൊഴി. അന്ന് സംഭവം നേരില്‍ കണ്ട മൂത്ത മകളുടെ മൊഴി കേസില്‍ നിര്‍ണായകമായിരുന്നു. 15 വര്‍ഷത്തോളം വിവിധ മെഡിക്കല്‍ സ്റ്റോറുകളില്‍ ജോലി ചെയ്തിരുന്ന പ്രതി സംഭവം നടക്കുമ്പോള്‍ കുണ്ടറയിലെ മെഡിക്കല്‍ സ്റ്റോറില്‍ ജീവനക്കാരനായിരുന്നു.
കട ഉടമയുടെ ഭര്‍ത്താവായ റിട്ട. വെറ്ററിനറി സര്‍ജന്‍ മെഡിക്കല്‍ സ്റ്റോറിനോട് ചേര്‍ന്നു പെറ്റ് ഷോപ്പ് നടത്തുന്നുണ്ട്. അവിടെ വളര്‍ത്തുമൃഗങ്ങളെ ചികിത്സിക്കാറുണ്ട്. ഇവിടെയെത്തിച്ച മുയലിനെ രക്ഷിക്കാന്‍ കഴിയാത്തതിനാല്‍ ദയാവധം നടത്തിയിരുന്നു. അതിന്റെ ബാക്കി മരുന്ന് കൈക്കലാക്കിയാണ് കൊല നടത്തിയത്.
പ്രതികരിക്കാൻ ഇവിടെ എഴുതുക: