പ്രധാനമന്ത്രിയുടെ വികസന മാതൃകയുടെ മുഖമുദ്രകളാണ് പദ്ധതികളുടെ പൂർത്തീകരണം : നിർമല സീതാരാമൻ

ഗുവാഹത്തി: തറക്കല്ലിട്ട ശേഷം പദ്ധതികൾ പൂർത്തീകരിക്കുന്നതാണ് പ്രധാനമന്ത്രി നരേന്ദ്ര മോദിയുടെ വികസന മാതൃകയുടെ മുഖമുദ്രയെന്ന് കേന്ദ്രമന്ത്രി നിർമല സീതാരാമൻ വ്യാഴാഴ്ച പറഞ്ഞു. ഐഐടി-ഗുവാഹത്തിയിൽ സംഘടിപ്പിച്ച ‘വികസിത് ഭാരത് കാമ്പസ് പരിപാടിയിൽ സംസാരിക്കുകയായിരുന്നു അവർ.

2014ന് മുമ്പ് പദ്ധതികൾക്ക് തറക്കല്ലിട്ടിരുന്നുവെങ്കിലും പദ്ധതികൾ സമയബന്ധിതമായി അന്നത്തെ സർക്കാരുകൾ പൂർത്തിയാക്കിയില്ലെന്നും കേന്ദ്രത്തിൽ മോദി സർക്കാർ അധികാരത്തിൽ വന്നപ്പോളാണ് ഇവയെല്ലാം പൂർത്തീകരിച്ചതെന്നും കേന്ദ്ര ധനമന്ത്രി സീതാരാമൻ അവകാശപ്പെട്ടു.

മുൻ സർക്കാരുകൾ പദ്ധതികൾ പൂർത്തീകരിക്കുന്നതിലെ കാലതാമസം രാജ്യത്തിന്റെ പ്രതിച്ഛായയെ പ്രതികൂലമായി ബാധിച്ചു. ഇന്ത്യ അതിന്റെ പദ്ധതികൾ പൂർത്തിയാക്കുന്നില്ല എന്ന പ്രതീതിയാണ് ഉണ്ടാക്കിയതെന്നും അവർ വിമർശിച്ചു.