കന്യാകുമാരി ജില്ലയിലെ വിളവങ്കോട് എംഎല്‍എയും പ്രമുഖ കോണ്‍ഗ്രസ് നേതാവും അഖിലേന്ത്യാ മഹിളാ കോണ്‍ഗ്രസ് ജനറല്‍ സെക്രട്ടറിയും നിയമസഭാ പാര്‍ട്ടി ചീഫ് വിപ്പുമായ എസ് വിജയധരണി എംഎല്‍എ സ്ഥാനം രാജിവെച്ചു.
ബിജെപിയില്‍ ചേര്‍ന്നതിനു പിന്നാലെയാണ് രാജി സമര്‍പ്പിച്ചത്. സ്പീക്കര്‍ക്കാണ് വിജയധരണി രാജി സമര്‍പ്പിച്ചത്. കോണ്‍ഗ്രസിന്റെ പ്രാഥമിക അംഗത്വത്തില്‍ നിന്ന് രാജിവെച്ചതായി വിജയധരണി കഴിഞ്ഞ ദിവസം എക്‌സിലൂടെ അറിയിച്ചിരുന്നു.
കന്യാകുമാരി സ്വദേശിനിയായ വിജയധരണി സംസ്ഥാനത്തെ കോണ്‍ഗ്രസിന്റെ പ്രമുഖ വനിതാ നേതാക്കളില്‍ ഒരാളാണ്. നിയമസഭയില്‍ കോണ്‍ഗ്രസിന്റെ ചീഫ് വിപ്പും മഹിളാകോണ്‍ഗ്രസിന്റെ ദേശീയ ജനറല്‍ സെക്രട്ടറിയുമായിരുന്നു വിജയധരണി. തെരഞ്ഞെടുപ്പുകളില്‍ തുടര്‍ച്ചയായി വന്‍ ഭൂരിപക്ഷത്തില്‍ വിജയം കരസ്ഥമാക്കിയിട്ടും പാര്‍ട്ടിയില്‍ അര്‍ഹമായ സ്ഥാനം ലഭിച്ചിരുന്നില്ല. കേരളവുമായി ചേര്‍ന്ന് കിടക്കുന്ന വിളവങ്കോട് മണ്ഡലത്തെ പ്രതിനിധീകരിച്ച് 2011 മുതല്‍ മൂന്നുതവണ എംഎല്‍എയായി.
പ്രധാനമന്ത്രി നരേന്ദ്ര മോദിയുടെ പ്രവര്‍ത്തനങ്ങളാണ് തന്നെ ബിജെപിയിലേക്ക് ആകര്‍ഷിച്ചതെന്ന് വിജയധരണി പറഞ്ഞു. നരേന്ദ്ര മോദിയുടെ നേതൃത്വം ഇന്നത്തെ ഭാരതത്തിന് ആവശ്യമാണ്. പ്രധാനമന്ത്രിയും കേന്ദ്രസര്‍ക്കാരും വനിതാ സംവരണബില്‍ പാസാക്കിയതുള്‍പ്പെടെ സ്ത്രീശാക്തീകരണത്തിനായി വിവിധ പദ്ധതികള്‍ നടപ്പാക്കുന്നു. ബിജെപി വനിതകള്‍ക്ക് മുന്‍ഗണന നല്‍കുന്നുവെന്ന് അവര്‍ പറഞ്ഞു.
കോണ്‍ഗ്രസിന്റെ പ്രധാനദൗര്‍ബല്യം ആഭ്യന്തരരാഷ്‌ട്രീയമാണെന്നും വിജയധരണി ചൂണ്ടിക്കാട്ടി. ഓരോ കോണ്‍ഗ്രസ് നേതാക്കളും അവരവരുടെ താല്പര്യത്തിനായി ഗ്രൂപ്പു കളിക്കുകയാണ്. ബിജെപിയെ തമിഴ്നാട്ടില്‍ ശക്തിപ്പെടുത്താനായി പ്രവര്‍ത്തിക്കുമെന്നും അണ്ണാമലൈയുടെ നേതൃത്വത്തില്‍ പാര്‍ട്ടി വളരുകയാണെന്നും വിജയധരണി കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: