യുവാക്കളുടെ മരണം; പന്നിക്ക് വെച്ച ഇലക്ട്രിക് കെണിയിൽ പെട്ടെന്ന് മൊഴി നൽകി സ്ഥലം ഉടമ

പാലക്കാട്: കൊടുമ്പ് പഞ്ചായത്തിലെ കരിങ്കപ്പുള്ളിയിൽ വയലിൽ കുഴിച്ചിട്ട നിലയിൽ കണ്ടെത്തിയ മൃതദേഹങ്ങൾ പുറത്തെടുത്തു. വസ്ത്രങ്ങൾ ഇല്ലാത്ത നിലയിൽ ഒന്നിന് പിന്നാലെ മറ്റൊന്നായാണ് ഇവിടെ നിന്നും മൃതദേഹങ്ങൾ കണ്ടെത്തിയത്. കാരോക്കോട്ടുപുര ഷിജിത്ത്, പുതുശ്ശേരി കാളാണ്ടിത്തറ സതീഷ് എന്നിവരുടേതാണ് മൃതദേഹം എന്ന് തിരിച്ചറിഞ്ഞു.

പന്നിക്ക് വെച്ച കെണിയിൽപ്പെട്ടാണ് യുവാക്കൾ മരിച്ചതെന്ന് സ്ഥലം ഉടമ അനന്തൻ മൊഴി നൽകിയിട്ടുണ്ട്. ഇയാളെ പോലീസ് കസ്റ്റഡിയിൽ എടുത്തിട്ടുണ്ട്. മറ്റാർക്കെങ്കിലും സംഭവത്തിൽ പങ്കുണ്ടോയെന്നും അന്വേഷിച്ച് വരികയാണ്. തിങ്കളാഴ്ച പുലർച്ചെയോടെ യുവാക്കൾ ഇവിടെയെത്തുന്നത് സിസിടിവി ദൃശ്യങ്ങളിൽ നിന്നും വ്യക്തമായിരുന്നു. ഇവർക്കൊപ്പമുണ്ടായിരുന്ന മറ്റു രണ്ടുപേർ നൽകിയ മൊഴിയുടെ അടിസ്ഥാനത്തിലാണ് പ്രദേശത്ത് പരിശോധന നടത്തിയത്.

മണ്ണ് മാറിക്കിടക്കുന്നത് ശ്രദ്ധയിൽപ്പെട്ടതോടെ യുവാക്കളുടെ മൃതദേഹം ഇവിടെയുണ്ട് എന്ന നിഗമനത്തിൽ എത്തുകയായിരുന്നു. എന്നാൽ തിങ്കളാഴ്ച പുലർച്ചെ സ്ഥലം ഉടമ ഇവിടെ എത്തിയപ്പോൾ മൃതദേഹങ്ങൾ കണ്ടുവെന്നാണ് മൊഴി നൽകിയത്. പന്നിയ്‌ക്ക് വേണ്ടി വെച്ച ഇലക്ട്രിക് കെണിയിൽപ്പെട്ട് യുവാക്കൾ മരണപ്പെട്ടുവെന്ന് മനസിലാക്കിയ ഉടമ മൃതദേഹങ്ങൾ കുഴിച്ചിടുകയായിരുന്നു. സംഭവത്തിൽ മറ്റാരുടെയെങ്കിലും സഹായം ലഭിച്ചിരുന്നോ എന്ന് അന്വേഷിച്ച് വരികയാണ്.