കൊച്ചി : എറണാകുളം ജനറല്‍ ആശുപത്രിയിലെ ലൈംഗികാതിക്രമത്തില്‍ പ്രതിയായ ഡോക്ടറെ അറസ്റ്റ് ചെയ്യുന്നത് കോടതി തടഞ്ഞു. മുന്‍കൂര്‍ ജാമ്യാപേക്ഷയില്‍ തീരുമാനമാകും വരെയാണ് ഡോക്ടര്‍ മനോജിനെ അറസ്റ്റ് ചെയ്യുന്നത് തടഞ്ഞത്. എറണാകുളം ജില്ലാ സെഷന്‍സ് കോടതിയാണ് കേസ് പരിഗണിച്ചത്.
പരാതിക്കാരിയായ വനിതാ ഡോക്ടറുടെ മൊഴി കഴിഞ്ഞ ദിവസം പൊലീസ് രേഖപ്പെടുത്തിയിരുന്നു. സംഭവം നടന്ന 2019ലെ മെഡിക്കല്‍ രേഖകള്‍ ആശുപത്രിയില്‍ നിന്ന് ശേഖരിക്കാനും പൊലീസ് തീരുമാനിച്ചു. ഇതിനുശേഷം ഡോക്ടര്‍ മനോജിനെ അറസ്റ്റ് ചെയ്യുന്നത് അടക്കമുള്ള നടപടികളിലേക്ക് കടക്കാനായിരുന്നു പൊലീസ് നീക്കം. ഇതിനിടയിലാണ് അറസ്റ്റ് തടഞ്ഞത്.
ഈ മാസം ഒന്നിനാണ് സാമൂഹ്യമാധ്യമത്തിലൂടെ വനിതാ ഡോക്ടര്‍ ലൈംഗികാതിക്രമത്തെപ്പറ്റി വെളിപ്പെടുത്തല്‍ നടത്തിയത്. 2019ല്‍ ഹൗസ് സര്‍ജന്‍സി ചെയ്യുമ്പോള്‍ സീനിയര്‍ ഡോക്ടര്‍ ബലമായി ചുംബിച്ചതായി ഡോക്ടര്‍ ഫേസ്ബുക്കില്‍ കുറിച്ചു.
സീനിയര്‍ ഡോക്ടര്‍ക്കെതിരെ തൊട്ടടുത്ത ദിവസം മുതിര്‍ന്ന ഉദ്യോഗസ്ഥരോട് പരാതിപ്പെട്ടിരുന്നതായി വനിത ഡോക്ടര്‍ പറഞ്ഞു. ലൈംഗികാതിക്രമം കാട്ടിയ ഡോക്ടര്‍ ജനറല്‍ ആശുപത്രിയില്‍ നിന്ന് സ്ഥലം മാറി പോയതോടെയാണ് പോസ്റ്റിട്ടതെന്നും ഡോക്ടര്‍ പറയുന്നു.
പ്രതികരിക്കാൻ ഇവിടെ എഴുതുക: