മീന്‍മുട്ടയില്‍ ഓട്ടോറിക്ഷയും ലോറിയും കൂട്ടിയിടിച്ച് അഞ്ച് പേര്‍ക്ക് പരിക്ക്; ഒരാളുടെ പരിക്ക് ഗുരുതരം

ചെറുതോണി: ഓട്ടോറിക്ഷ നിയന്ത്രണംവിട്ട് ലോറിയിലിടിച്ച് ഓട്ടോയിലുണ്ടായിരുന്ന രണ്ട് കുട്ടികള്‍ ഉള്‍പ്പെടെ അഞ്ച് പേര്‍ക്ക് പരിക്കേറ്റു. കട്ടപ്പന സ്വദേശികളായ കണ്ടത്തിന്‍ കരയില്‍ ജോമാത്യു(28), പറ്റുവെട്ടിയില്‍ ജോളി ജോയി(45), തൊടുപുഴ സ്വദേശി നെല്ലിനില്‍ക്കും തടത്തില്‍ മോളി സന്തോഷ്(40), പയസ് സന്തോഷ്(4), സാനിയ സന്തോഷ്(12) എന്നിവര്‍ക്കാണ് പരിക്കേറ്റത്. 

പരിക്കേറ്റവരെ മറ്റ് വാഹനങ്ങളിലെത്തിയവര്‍ ഉടന്‍ തന്നെ ഇടുക്കി മെഡിക്കല്‍ കോളജ് ആശുപത്രിയിലെത്തിച്ചു. ഗുരുതരമായി പരിക്കേറ്റ ജോ മാത്യുവിനെ കട്ടപ്പനയിലെ സ്വകാര്യ ആശുപത്രിയിലേക്ക് കൊണ്ടുപോയി. മറ്റുള്ളവര്‍ ഇടുക്കി മെഡിക്കല്‍ കോളജാശുപത്രിയില്‍ ചികിത്സയിലാണ്. 

ഇന്നലെ രാവിലെ 9.20ന് കുളമാവിന് സമീപം മീന്‍മുട്ടിയിലാണ് അപകടം നടന്നത്. കട്ടപ്പനയില്‍ നിന്നും തൊടുപുഴക്ക് ചികിത്സക്കായി പോയവരുടെ ഓട്ടോറിക്ഷ തൊടുപുഴയില്‍ നിന്നും കട്ടപ്പന ഭാഗത്തേക്ക് ഭക്ഷ്യസാധനങ്ങളുമായിവന്ന ലോറിയുമായാണ് കൂട്ടിയിടിച്ചത്. ഇടുക്കിയില്‍ നിന്നും ഫയര്‍ഫോഴ്സും കുളമാവ് പോലീസും സംഭവസ്ഥലത്തെത്തിയിരുന്നു.