സാമൂഹ്യമാധ്യമങ്ങളില്‍ തരംഗം തീര്‍ത്ത് സുരേഷ് ഗോപി ചിത്രങ്ങളുടെ പ്രൊമോഷന്‍ വീഡിയോകള്‍. കാവല്‍ എന്ന സിനിമയുടെ ടീസറും സുരേഷ് ഗോപിയുടെ 250-മത് ചിത്രത്തിന്റെ അണിയറപ്രവര്‍ത്തകര്‍ തയ്യാറാക്കിയ മോഷന്‍ പോസ്റ്ററുമാണ് സമൂഹിക മാധ്യമങ്ങളില്‍ നിറഞ്ഞ് നില്‍ക്കുന്നത്. സൂപ്പര്‍ സ്റ്റാറിന്റെ പിറന്നാള്‍ ദിനത്തില്‍ പുറത്തിറക്കിയ ഇരു വീഡിയോകളും സിനിമാ ആരാധകര്‍ ഇരു കൈകളും നീട്ടി സ്വീകരിച്ചിരിക്കുകയാണ്.
മാസ് ഡയലോഗോടെ ആരംഭിക്കുന്ന കാവലിന്റെ ടീസര്‍ സുരേഷ് ഗോപിയുടെ ആക്ഷന്‍ സൂപ്പര്‍ സ്റ്റാറായുള്ള തിരിച്ചുവരവിന്റെ സൂചനകള്‍ നല്‍കുന്നു. നിതിന്‍ രഞ്ജി പണിക്കര്‍ സംവിധാനം ചെയ്യുന്ന ചിത്രം ഗുഡ് വില്‍ എന്റെര്‍റ്റൈന്മെന്റിന്റെ ബാനറില്‍ ജോബി ജോര്‍ജാണ് നിര്‍മ്മിക്കുന്നത്. സുരേഷ് ഗോപിയുടെ നിത്യഹരിത ആക്ഷന്‍ കഥാപാത്രങ്ങളൊരുക്കിയ രഞ്ജി പണിക്കറിന്റെ പാത മകനും പിന്തുടരുമെന്ന പ്രതീക്ഷയിലാണ് മലയാള സിനിമാ ആസ്വാദകര്‍.
കാവല്‍ സിനിമയുടെ ടീസര്‍ യൂട്യൂബ് ട്രെന്‍ഡിങ്ങില്‍ ഒന്നാം സ്ഥാനത്താണ് ഉള്ളത്. എസ്.ജി 250 മോഷന്‍ പോസ്റ്റര്‍ ട്രെന്‍ഡിങ്ങില്‍ മൂന്നാം സ്ഥാനത്തുമാണുള്ളത്.
സുരേഷ് ഗോപിയുടെ ഇരുന്നൂറ്റിയമ്പതാമത് സിനിമയുടെ മോഷന്‍ പോസ്റ്ററാണ് തരംഗമായി ഓടുന്ന രണ്ടാമത്തെ വീഡിയോ. കടുവാക്കുന്നേല്‍ കുറുവച്ചന്‍ എന്ന പേരിലാണ് ചിത്രത്തില്‍ താരം പ്രത്യക്ഷപ്പെടുന്നത്. പിറാന്നാള്‍ ദിനത്തില്‍ പുറത്തുവിട്ട വീഡിയോയില്‍ വേറിട്ട രൂപത്തിലാണ് സുരേഷ് ഗോപി എത്തിയിരിക്കുന്നത്. നവാഗതനായ മാത്യൂസ് തോമസ് സംവിധാനംചെയ്യുന്ന ചിത്രം നിര്‍മിക്കുന്നത് ടോമിച്ചന്‍ മുളകുപാടമാണ്.
പ്രതികരിക്കാൻ ഇവിടെ എഴുതുക: