കോഴിക്കോട്: കൊളത്തൂര്‍ അദ്വൈതാശ്രമം പ്രസിദ്ധീകരിക്കുന്ന അദ്വൈതാശ്രമം സത്സംഗം മാസികയുടെ പ്രകാശനം ശ്രീശങ്കര ജയന്തി ദിനത്തില്‍ 23ന് വൈകീട്ട് 5.30ന് കോഴിക്കോട് ജയ ഓഡിറ്റോറിയത്തില്‍ നടക്കും. കോഴിക്കോട് ശാരദാ മഠത്തിലെ പ്രവ്രാജിക മാതൃകാ പ്രാണാ മാതാജി ചടങ്ങില്‍ ദീപം തെളിയിക്കും.
ഡോ. കെ. മാധവന്‍കുട്ടിയുടെ അദ്ധ്യക്ഷതയില്‍ ചേരുന്ന യോഗത്തിന്റെ ഉദ്ഘാടനം കോഴിക്കോട് ജില്ലാ കലക്ടര്‍ എന്‍. പ്രശാന്ത് നിര്‍വ്വഹിക്കും. മാസികയുടെ പ്രകാശനകര്‍മ്മം സാഹിത്യകാരി പി. വത്സല ഡോ.കെ.എം. പ്രിയദര്‍ശന്‍ലാലിന് നല്‍കി നിര്‍വ്വഹിക്കും. സ്വാമി ചിദാനന്ദപുരി ആമുഖഭാഷണം നടത്തും.
സ്വാമിനി ശിവാനന്ദപുരി മാസികാ പരിചയം നടത്തും. സ്വാമി അദ്ധ്യാത്മാനന്ദ സരസ്വതി, സ്വാമി ബ്രഹ്മസ്വരൂപാനന്ദ, സ്വാമി വിനിശ്ചലാനന്ദ എന്നിവര്‍ അനുഗ്രഹ പ്രഭാഷണം നടത്തും. ആര്‍എസ്എസ് പ്രാന്തകാര്യവാഹ് പി. ഗോപാലന്‍കുട്ടി മാസ്റ്റര്‍, പി.ആര്‍. നാഥന്‍ എന്നിവര്‍ ആശംസ നേരും. മാസിക എഡിറ്റര്‍ എന്‍.കെ. പത്മപ്രഭ സ്വാഗതവും എം.കെ. രജീന്ദ്രനാഥ് നന്ദിയും പറയും.
സനാതന ധര്‍മ്മത്തിന്റെ ശക്തവും വേദാന്തശാസ്ത്രത്തിന്റെ ശുദ്ധവുമായ ശബ്ദം സമൂഹത്തില്‍ പ്രചരിക്കണം എന്ന സങ്കല്പത്തോടെയാണ് അദ്വൈതാശ്രമം സത്സംഗം മാസിക ആരംഭിക്കുന്നതെന്ന് ശ്രീ വല്ലോറക്കാവ് ക്ഷേത്രസമിതി അദ്ധ്യക്ഷന്‍ എം.കെ. രജീന്ദ്രനാഥ് അറിയിച്ചു. ക്ഷേത്രസമിതി ഉപാദ്ധ്യക്ഷന്‍ ടി.കെ. രവീന്ദ്രന്‍, കാര്യദര്‍ശി കെ. രവിശങ്കര്‍ എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: