തൃശൂര്‍: സംസ്ഥാനത്തെ ദേവസ്വം ബോര്‍ഡുകളുടെ ഓഡിറ്റ് സംവിധാനത്തില്‍ ജീവനക്കാരുടെ അപര്യാപ്തത വ്യക്തമാക്കുന്ന വിവരാവകാശ രേഖ പുറത്ത്. വര്‍ഷങ്ങളായി ഓഡിറ്റ് വിഭാഗങ്ങളിലെ ജീവനക്കാരുടെ എണ്ണം മാറ്റമില്ലാതെ തുടരുമ്പോഴും ഓഡിറ്റ് ചെയ്യേണ്ട സ്ഥാപനങ്ങളുടെയും കണക്കുകളുടെയും എണ്ണം വലുതാണെന്ന് രേഖകള്‍ വ്യക്തമാക്കുന്നതായി വിവരാവകാശ പ്രവര്‍ത്തകന്‍ കെ. ഗോവിന്ദന്‍ നമ്പൂതിരി പറഞ്ഞു.
സംസ്ഥാന ഓഡിറ്റ് വകുപ്പിന്റെ രേഖ പ്രകാരം, 2016-17 മുതല്‍ 2024-25 വരെയും 2025 ഏപ്രില്‍ 1 മുതല്‍ 2026 ജനുവരി 21 വരെയും തിരുവിതാംകൂര്‍ ദേവസ്വം ഓഡിറ്റ് കാര്യാലയത്തില്‍ 35, കൊച്ചിന്‍ ദേവസ്വത്തില്‍ 12, ഗുരുവായൂര്‍ ദേവസ്വത്തില്‍ 25 ജീവനക്കാരാണ് രേഖപ്പെടുത്തിയിട്ടുള്ളത്. മലബാര്‍ ദേവസ്വം ഓഡിറ്റ് വിഭാഗത്തിലെ മേഖലാ കാര്യാലയങ്ങളിലും ജീവനക്കാരുടെ എണ്ണം വര്‍ഷങ്ങളായി മാറ്റമില്ലാതെ തുടരുന്നു. കോഴിക്കോട് മേഖലയില്‍ 10, പാലക്കാട് 14, തലശ്ശേരി 8 എന്നിങ്ങനെയാണ് ജീവനക്കാരുടെ എണ്ണം. പരിമിതമായ ജീവനക്കാരെ ഉപയോഗിച്ച് ഓഡിറ്റ് ചുമതല നിര്‍വഹിക്കേണ്ട സാഹചര്യമാണ് നിലവിലുള്ളതെന്ന് ഗോവിന്ദന്‍ നമ്പൂതിരി ചൂണ്ടിക്കാട്ടി. കൊച്ചിന്‍ ദേവസ്വം ബോര്‍ഡ് ഓഡിറ്റ് കാര്യാലയത്തിലെ ജീവനക്കാരുടെ അപര്യാപ്തത പരിഗണിച്ച് ഹൈക്കോടതി അധിക തസ്തികകള്‍ അനുവദിക്കുന്നതിനുള്ള നിര്‍ദേശങ്ങള്‍ നല്‍കിയിരുന്നു. ഇതിന്റെ അടിസ്ഥാനത്തില്‍ കൊച്ചിന്‍ ദേവസ്വം ബോര്‍ഡ് ഓഡിറ്റ് കാര്യാലയത്തിലേക്ക് അധിക തസ്തികകള്‍ അനുവദിക്കുന്നതിനുള്ള പ്രൊപ്പോസല്‍ സര്‍ക്കാരിന്റെ പരിഗണനയിലാണെന്ന് വിവരാവകാശ രേഖയില്‍ പറയുന്നു.
ഹൈക്കോടതി ഇടപെട്ടിട്ടും അധിക ജീവനക്കാരെ അനുവദിക്കുന്ന കാര്യത്തില്‍ സര്‍ക്കാര്‍ അനുമതി വൈകുകയാണ്. മലബാര്‍ ദേവസ്വത്തിന്റെ പുതിയ തസ്തികകള്‍ സൃഷ്ടിക്കുന്നതിനുള്ള പ്രൊപ്പോസല്‍ സര്‍ക്കാരിന് സമര്‍പ്പിച്ചിട്ടുണ്ടെന്നും രേഖ വ്യക്തമാക്കുന്നു. അതേസമയം, തിരുവിതാംകൂര്‍ ദേവസ്വത്തിന്റെ ഓഡിറ്റ് കാര്യക്ഷമമാക്കുന്നതിനായി നിലവിലെ സ്റ്റാഫ് പാറ്റേണില്‍ ആവശ്യമായ മാറ്റങ്ങള്‍ വരുത്തുന്നതുമായി ബന്ധപ്പെട്ട ഉദ്യോഗസ്ഥ ഭരണപരിശോധനാ വകുപ്പിന്റെ പ്രാഥമിക റിപ്പോര്‍ട്ടും സര്‍ക്കാരിന് സമര്‍പ്പിച്ചിട്ടുണ്ടെന്നാണ് മറുപടി.
