തിരുവനന്തപുരം:: തന്റെ കൊക്കിന് ജീവൻ ഉണ്ടെങ്കിൽ വാഴോട്ടുകോണം വാർഡ് കൗൺസിലർ ആർ സുഗതൻ തിരുവനന്തപുരം കോർപ്പറേഷൻ കൗൺസിൽ യോഗത്തിന് കയറില്ല എന്ന് കോണ്‍ഗ്രസ് നേതാവ് കെ.എസ്. ശബരീനാഥന്‍. എന്നാല്‍ സുഗതന്‍ തിരിച്ചുവരികയും തിരുവനന്തപുരം നഗരസഭയുടെ ഉള്ളില്‍ സുഗതന്‍ കയറുകയും ചെയ്യുമെന്നായിരുന്നു ബിജെപി നേതാവ് കരമന ജയന്റെ മറുപടി.
തിങ്കളാഴ്ച തിരുവനന്തപുരം കോര്‍പറേഷനില്‍ നടന്ന അനിഷ്ടസംഭവങ്ങളുടെ പശ്ചാത്തലത്തില്‍ ആയിരുന്നു ശബരിനാഥിന്റെ ഈ വെല്ലുവിളി. തിരുവനന്തപുരം കോര്‍പറേഷനിലെ കൗണ്‍സിലര്‍മാര്‍ ഒപ്പിടേണ്ട രജിസ്റ്റര്‍ കെ.എസ്. ശബരിനാഥന് തട്ടിപ്പറിച്ചുവെന്ന കാര്യം കോര്‍പറേഷന്‍ ജീവനക്കാരനായ റഷീദ് വാര്‍ത്താസമ്മേളനത്തില്‍ വെട്ടിത്തുറന്ന് പറഞ്ഞത് ശബരിനാഥന് ക്ഷീണമുണ്ടാക്കിയിട്ടുണ്ട്. മേയര്‍ വിവി രാജേഷിനെതിരെ അവിശ്വാസപ്രമേയം കൊണ്ടുവരാന്‍ ശബരിനാഥന് സിപിഎമ്മിനോട് പരസ്യമായി പിന്തുണ ആവശ്യപ്പെട്ടെങ്കിലും സിപിഎം അത് നിരസിച്ചതും ശബരിനാഥന് കോട്ടമുണ്ടാക്കിയിട്ടുണ്ട്.
ഇതിന് പിന്നാലെയാണ് ശബരിനാഥന് മറുപടിയുമായി തിരുവനന്തപും സിറ്റി ജില്ലാ സെക്രട്ടറി കരമന ജയന്‍ എത്തിയത്. “പ്രിയപ്പെട്ട ശബരിനാഥിനോട് ഒറ്റ കാര്യമേ പറയാനുള്ളൂ, സുഗതൻ തിരിച്ചുവരും. തിരുവനന്തപുരം നഗരസഭയുടെ ഉള്ളിൽ സുഗതൻ കയറുകയും ചെയ്യും. ശബരിനാഥ് കൊക്കിനെയും, കോഴിയെയും, കാക്കയേയും നോക്കി ഇരുന്നോളു”- ഇതായിരുന്നു കരമന ജയന്റെ വെല്ലുവിളി.
