തിരുവനന്തപുരം: കേരളത്തിലെ യുവാക്കൾ കാത്തിരിക്കുന്ന വാഹന മോഡിഫിക്കേഷനുമായി ബന്ധപ്പെട്ട വിവരങ്ങൾ പുറത്ത്. സ്റ്റിക്കറുകളും ലൈറ്റുകളും ഉള്പ്പെടെ 18 തരം മോഡിഫിക്കേഷന് ആവാമെന്ന് ഗതാഗത കമ്മീഷണറുടെ റിപ്പോര്ട്ടില് പറയുന്നു. ഗതാഗത കമ്മീഷണര് തയ്യാറാക്കിയ പട്ടിക സംസ്ഥാന സര്ക്കാര് പരിശോധിച്ച് അന്തിമ തീരുമാനമെടുക്കും.
വാഹനങ്ങളുടെ നിറം മാറ്റുന്നതിന് പണം അടക്കുകയും പ്രത്യേക അനുമതിയും വാങ്ങുകയും വേണമെന്ന് റിപ്പോർട്ടിൽ പറയുന്നു. അധിക സ്പീക്കറുകളും ഘടിപ്പിക്കാം. ഇതുസംബന്ധിച്ച് ഗതാഗത കമീഷൻ പഠന റിപ്പോർട്ട് തയാറാക്കി.
റിപ്പോര്ട്ടിലെ പ്രധാന നിര്ദേശങ്ങള്
വാഹനങ്ങളില് ഇഷ്ടമുള്ള ചിത്രങ്ങളും രൂപങ്ങളും അനുവദിക്കും.
പൊതുസ്ഥലത്ത് പ്രദര്ശിപ്പിക്കാവുന്ന തരത്തില് മാന്യമായതായിരിക്കണം ചിത്രങ്ങള്
വാഹനത്തിനുള്ളില് രസകരമായ, പല നിറത്തിലുള്ള ലൈറ്റുകള് അനുവദിക്കും.
പാട്ടൊക്കെയായി അടിച്ചുപൊളിച്ച് പോകാന് കൂടുതല് സ്പീക്കറുകളും അനുവദിക്കും
സീറ്റ് കവര്, ഫ്ളോര് മാറ്റ്, സ്റ്റീയറിങ് വീല് കവര്, ഡാഷ് കാം, റിവേഴ്സ് കാം, പാര്ക്കിങ് സെന്സറുകള്, ജിപിഎസ് ട്രാക്കര്, റൂഫ് കാരിയേഴ്സ് എന്നിവ അനുവദിക്കും
50 ശതമാനം വരെ കാഴ്ച മറയ്ക്കുന്ന സണ്ഫിലിംസ് അനുവദിക്കും
മോഡിഫിക്കേഷന് വേണ്ടി കാത്തിരിക്കുന്നവര് ഈ പട്ടികകൊണ്ട് തൃപ്തരാകുമോ എന്ന സംശയവും ഉയരുന്നുണ്ട്. കാരണം ഇതിലുള്ള ഭൂരിഭാഗവും ഇപ്പോള് തന്നെ അനുവാദമുള്ളതാണ്. ഇതിന് അപ്പുറത്തേക്കുള്ള മോഡിഫിക്കേഷന് അനുവദിക്കാന് കേന്ദ്ര മോട്ടോര് വാഹന നിയമപ്രകാരം ബുദ്ധിമുട്ടാണെന്നും ഗതാഗത കമ്മീഷണറും ഉറപ്പിച്ച് പറയുന്നു.
വാഹന നിർമാതാക്കൾ അനുവദിക്കുന്ന മോഡിഫിക്കേഷന് അപ്പുറമുള്ള ഒരു രൂപമാറ്റവും അനുവദിക്കാൻ സാധിക്കില്ലെന്നാണ് 1988 ലെ മോട്ടോർ വാഹന നിയമം വകുപ്പ് 52ൽ പറയുന്നത്. കേരള മോട്ടോർ വാഹന ചട്ടങ്ങളുടെ അടിസ്ഥാനത്തിൽ വാഹനങ്ങളിലെ രൂപമാറ്റത്തിന് അനുമതി നൽകിയ കേരള ഹൈകോടതി ഡിവിഷൻ ബെഞ്ചിന്റെ ഉത്തരവ് തള്ളി 2019 ൽ സുപ്രീംകോടതി പുറപ്പെടുവിച്ച വിധി നിർണായകമാണ്.
ഇത് മറികടന്ന് എങ്ങനെ മോഡിഫിക്കേഷൻ സാധ്യമാകുമെന്നാണ് നിയമവിദഗ്ധരുടെ ചോദ്യം. അപകടമുണ്ടായാൽ ഇൻഷുറൻസ് ക്ലെയിം നിഷേധിക്കാനും മോഡിഫിക്കേഷൻ കാരണമാകുമെന്നും ഈ മേഖലയിലുള്ളവർ പറയുന്നു.
