ന്യൂഡൽഹി ; നോർവേയിൽ ഇന്ത്യയെയും,മോദിയെയും അപമാനിക്കാൻ ശ്രമിച്ച നോർവീജിയൻ മാധ്യമപ്രവർത്തക ഹെല്ലെ ലയെങ്ങിന്റെ ഇൻസ്റ്റഗ്രാം, ഫേസ്ബുക്ക് അക്കൗണ്ടുകൾ മെറ്റ റദ്ദാക്കി. ചോദ്യോത്തര സെഷനിലല്ലാതെ ഹെല്ലെ ലയെങ് ഉന്നയിച്ച ചോദ്യം മോദി അവഗണിച്ചിരുന്നു. പിന്നീട് ഇന്ത്യൻ വിദേശകാര്യ ഉദ്യോഗസ്ഥർ തന്നെ ഹെല്ലെ ഉന്നയിച്ച ചോദ്യത്തിന് മറുപടി നൽകുകയും ചെയ്തിരുന്നു.
ഒസ്ലോ ആസ്ഥാനമായുള്ള ‘ദാഗ്സാവിസെൻ’ എന്ന പത്രത്തിലെ മാധ്യമപ്രവര്ത്തകയാണ് ഹെല്ലെ ലയെങ്. കരുതി കൂട്ടി ആസൂത്രണം ചെയ്ത നീക്കമാണ് ഹെല്ലെ നടത്തിയതെന്ന് വ്യക്തമായിരുന്നു. രണ്ട് വർഷമായി എക്സിൻ സജീവമല്ലാതിരുന്ന ഹെല്ലെ വീണ്ടും സജീവമായതും മോദി നോർവേയിൽ എത്തിയതിനു പിന്നാലെയായിരുന്നു.
ഹെല്ലെയുടെ നീക്കങ്ങൾ ആസൂത്രിതമാണെന്ന് വ്യക്തമായതിന് പിന്നാലെ ഇന്ത്യക്കാർ ഒന്നടങ്കം അവർക്കെതിരെ രംഗത്തെത്തി. അക്കൗണ്ടുകൾ റദ്ദാക്കിയതിന് പിന്നിലെ കൃത്യമായ കാരണം മെറ്റ വ്യക്തമാക്കിയിട്ടില്ല. വലിയ തോതിലുള്ള റിപ്പോർട്ടിങ്ങുകൾ കാരണം അക്കൗണ്ടുകൾ താൽക്കാലികമായി പൂട്ടിയതാകാം എന്നാണ് കരുതപ്പെടുന്നത്.
ഇതിനുമുന്പ് ഇത്തരമൊരു അനുഭവമുണ്ടായിട്ടില്ലെന്ന് ഹെല്ലെ തന്നെ പറയുകയും ചെയ്തു. തന്റെ അക്കൗണ്ടുകൾ മെറ്റ ഉടൻ തന്നെ പുനഃസ്ഥാപിക്കുമെന്ന പ്രതീക്ഷിക്കുന്നെന്നും ഹെല്ലെ കുറിച്ചു.
