കൊച്ചി:കൊച്ചി തുറമുഖത്ത് നങ്കൂരമിട്ടിരുന്ന ഇറാന് യുദ്ധക്കപ്പലായ ‘ഐആര്ഐഎസ്’ ലവാന്റെ ദൃശ്യങ്ങള് പകര്ത്തി അറസ്റ്റിലായ റിപ്പബ്ലിക് ടിവി റിപ്പോര്ട്ടര് ശങ്കര് സി.ജി, ക്യാമറാമാന് മണി എസ്. എന്നിവര്ക്ക് ജാമ്യം അനുവദിച്ച് എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി .ഈ മാസം എട്ടിനായിരുന്നു ഇവരെ പൊലീസ് കസ്റ്റഡിയിലെടുത്തത്.
ഒരു ലക്ഷം രൂപയുടെ ബോണ്ടും രണ്ട് ആള്ജാമ്യത്തിന്റെയും അടിസ്ഥാനത്തിലാണ് കോടതി ജാമ്യം അനുവദിച്ചത്.അന്വേഷണം നിര്ണായക ഘട്ടത്തിലാണെന്നും മാധ്യമപ്രവര്ത്തകരുടെ പക്കല് നിന്നുള്ള ഉപകരണങ്ങള് പിടിച്ചെടുത്തുവെന്നും കോടതി നിരീക്ഷിച്ചു.സാക്ഷികള് തീര സംരക്ഷണ സേനാംഗങ്ങളായതിനാല് അവരെ സ്വാധീനിക്കാന് പ്രതികള്ക്ക് കഴിയില്ലെന്നും കോടതി വിലയിരുത്തി.
പശ്ചിമേഷ്യന് സംഘര്ഷങ്ങളുടെ പശ്ചാത്തലത്തിലാണ് ഇറാനിയന് കപ്പല് കൊച്ചിയില് നങ്കൂരമിട്ടത്. തീര സുരക്ഷാ മേഖലയില് അനുമതിയില്ലാതെ ഡ്രോണ് ഉപയോഗിച്ചും ബോട്ട് വാടകയ്ക്കെടുത്തുമാണ് ഇവര് ദൃശ്യങ്ങള് പകര്ത്താന് ശ്രമിച്ചത്. സിഐഎസ്എഫ് ആണ് മാധ്യമ പ്രവര്ത്തകരെ പിടികൂടി പൊലീസിന് കൈമാറിയത്.
ഔദ്യോഗിക രഹസ്യ നിയമ പ്രകാരമുള്ള ചാരവൃത്തി,ക്രിമിനല് അതിക്രമം തുടങ്ങിയ ഗുരുതര വകുപ്പുകളാണ് ഇവര്ക്കെതിരെ ചുമത്തിയിരുന്നത്.അടുത്ത രണ്ട് മാസത്തേക്ക് എറണാകുളം ജില്ല വിട്ടുപോകരുത്,എല്ലാ ഞായറാഴ്ചയും അന്വേഷണ ഉദ്യോഗസ്ഥന് മുന്നില് ഹാജരാകണം എന്നിങ്ങനെ വ്യവസ്ഥകളും കോടതി നിര്ദ്ദേശിച്ചു.
