തിരുവനന്തപുരം: യുനെസ്‌കോ പൈതൃക സാധ്യതാപ്പട്ടികയില്‍ ഇടം പിടിച്ചെങ്കിലും തകര്‍ച്ച ഭീഷണി നേരിടുന്ന പാപനാശം കുന്നുകളെ സംരക്ഷിക്കണമെങ്കില്‍ കടമ്പകളേറെ. പ്രകൃതിക്ഷോഭം മൂലമുണ്ടാകുന്ന കുന്നിടിയലും പലവിധ നിര്‍മാണങ്ങള്‍ക്കായി മനുഷ്യന്‍ കുന്നിടിച്ചു നിരത്തുന്നതും തുടരുകയാണ്. അനധികൃത നിര്‍മാണങ്ങളും മനുഷ്യരുടെ ഇടപെടലുകളുമാണ് കുന്നിനെ ദുര്‍ബലപ്പെടുത്തുന്നത്.
നീന്തല്‍ക്കുളമുള്‍പ്പെടുന്ന വലിയ റിസോര്‍ട്ടുകളും കുന്നില്‍ നിര്‍മിക്കുന്നു. കുന്ന് തുരന്ന് കടല്‍തീരത്തേക്കിറങ്ങാന്‍ വഴി നിര്‍മിച്ചിട്ടുമുണ്ട്. തീരത്തേക്ക് പടിക്കെട്ടുകള്‍ നിര്‍മിച്ചും മാലിനജലം ഒഴുക്കിവിട്ടും കുന്നിനെ കാലങ്ങളായി നശിപ്പിച്ചുകൊണ്ടിരിക്കുകയാണ്. തിരമാലകള്‍ കുന്നിന്റെ അടിഭാഗത്ത് ശക്തമായി അടിക്കുന്നതു കാരണം മണ്ണൊലിച്ചുപോകുന്നു. കുന്നിനു മുകളില്‍ ഇരുന്നൂറിലധികം റിസോര്‍ട്ടുകളും വ്യാപാരസ്ഥാപനങ്ങളുമുണ്ട്. അതില്‍നിന്നെല്ലാമുള്ള വെള്ളം മണ്ണിലൂടെ ഊര്‍ന്നിറങ്ങി മഴവെള്ളവും കൂടിച്ചേര്‍ന്ന് കുന്നിന്റെ മുകള്‍ഭാഗത്തെ മണ്ണിടിയുന്നുണ്ട്.
മണ്ണുമാന്തിയന്ത്രം കുന്നിന്റെ മരണമണി മുഴക്കുന്നുണ്ട്. ഇതിനെതിരെ ഉന്നത ഉദ്യോഗസ്ഥര്‍ക്കുള്‍പ്പെടെ പരാതി നല്‍കിയെങ്കിലും നടപടികളും ഉണ്ടായിട്ടില്ല. പാപനാശം കുന്നുകള്‍ക്ക് പ്രത്യേക പദവി ലഭിക്കുന്നതിലൂടെ കേന്ദ്ര സര്‍ക്കാരിനു കീഴിലുള്ള വകുപ്പുകളുടെ നേരിട്ടുള്ള ഇടപെടലുണ്ടാകുമെന്ന ആശ്വാസത്തിലാണ് പരിസ്ഥിതി പ്രവര്‍ത്തകര്‍.
പാപനാശം കുന്ന് സംരക്ഷണത്തിനായി മിനിസ്ട്രി ഓഫ് എര്‍ത്ത് സയന്‍സ് ശാസ്ത്രീയപഠനം നടത്തി റിപ്പോര്‍ട്ട് നല്‍കിയിരുന്നു. ഇനി സെന്റര്‍ ഫോര്‍ വാട്ടര്‍ റിസോഴ്‌സ് ഡിവലപ്‌മെന്റ് ആന്‍ഡ് മാനേജ്‌മെന്റിന്റെ പഠനം നടത്തേണ്ടതുണ്ട്. രണ്ടു പഠനങ്ങള്‍ ചേര്‍ത്ത് റിപ്പോര്‍ട്ടാക്കി കേന്ദ്രസര്‍ക്കാരിനു നല്‍കും. അതനുസരിച്ച് കുന്ന് സംരക്ഷണത്തിന് തുകയും അനുവദിക്കും.
