തിരുവനന്തപുരം: മതത്തെയും ആരാധനാലയത്തെയും മതപണ്ഡിതന്മാരെയും ഉപയോഗിച്ച് വിശ്വാസികളില് നിന്ന് കോടിക്കണക്കിന് രൂപയുടെ പണവും സ്വര്ണവും തട്ടിയെടുത്ത സ്ഥാപനം അല് മുക്താദിര് ജുവല്ലറി പൂട്ടി. സ്വര്ണാഭരണങ്ങള്ക്ക് പണിക്കൂലിയും പണിക്കുറവും ഈടാക്കുന്നില്ലെന്നും സൗദി അറേബ്യയില് നിന്ന് ഇറക്കുമതി ചെയ്യുന്ന ശുദ്ധസ്വര്ണമാണെന്നുമുള്ള ഉടമകളുടെ പ്രചരണത്തില് വിശ്വസിച്ച് 1600 ലേറെ നിക്ഷേപകരില് നിന്ന് 1100 കോടിയോളം രൂപ തട്ടിയെടുത്തതായാണ് പരാതി. കൂടുതല് പരാതികള് ലഭിക്കുന്നതോടെ തട്ടിപ്പിന്റെ വ്യാപ്തി ഇനിയും കൂടാനാണ് സാധ്യത. കേരളത്തിലെ ശാഖകളെല്ലാം പൂട്ടി അല് മുക്താദിര് ജുവല്ലറി ഉടമ മുഹമ്മദ് മന്സൂര് അബ്ദുല് സലാം മുങ്ങിയിട്ട് ആറ് മാസമായി. ഇതുവരെയും ഇയാളെക്കുറിച്ച് പോലീസിന് ഒരു വിവരവും ലഭിച്ചിട്ടില്ല.
കുറഞ്ഞകാലം കൊണ്ട് സംസ്ഥാനത്തെ വന്നഗരങ്ങളിലും ചെറുപട്ടണങ്ങളിലും കൂണുപോലെ അല് മുക്താദിര് ജുവല്ലറിയുടെ ശാഖകള് മുളച്ചുപൊന്തി. കേരളത്തിലങ്ങോളമിങ്ങോളം 44 വന് ഷോറൂമുകളാണ് അല് മുക്താദിര് ജുവല്ലറി കെട്ടിപ്പൊക്കിയത്. ജുവല്ലറിയിലേക്ക് ആളുകളെ ക്യാന്വാസ് ചെയ്യാന് നിരവധി ഏജന്റുമാരെ നിയമിച്ച് അവര്ക്കെല്ലാം നിശ്ചിത തുക കമ്മിഷനും നല്കി.
ഒരു സുപ്രഭാതത്തില് നിക്ഷേപകരുടെ ഇടനെഞ്ചില് തീകോരിയിട്ട് അല്മുക്താദിര് ജുവല്ലറി പൂട്ടിയെന്ന വാര്ത്ത പരന്നു. തുടരെ തുടരെ കേരളത്തിലെ 44 ഷോറൂമുകളും പൂട്ടി. സ്വര്ണത്തിനുവേണ്ടി പണമടച്ച് കാത്തിരുന്നവരും അമിത പലിശ മോഹിച്ച് പണവും പലിശയും ഉള്പ്പെടെ വീണ്ടും നിക്ഷേപിച്ച് കബളിപ്പിക്കപ്പെട്ടവരും നിരവധിയാണ്. ആകര്ഷകമായ പരസ്യങ്ങളിലും ശുദ്ധ സ്വര്ണമെന്ന ഉടമകളുടെയും മതപണ്ഡിതരുടെയും വാക്കുകള് വിശ്വസിച്ചും നിരവധി സാധാരണക്കാര് തങ്ങളുടെ മക്കളുടെ വിവാഹത്തിന് വേണ്ടണ്ട സ്വര്ണത്തിന് വേണ്ടി പണം നിക്ഷേപിച്ച് കാത്തിരുന്നു. കസ്റ്റമേഴ്സ് നല്കുന്ന പഴയ സ്വര്ണ്ണാഭരണങ്ങളും പണവും നിശ്ചിത വര്ഷത്തേക്ക് ഫിക്സഡ് ഡപ്പോസിറ്റായി സ്വീകരിക്കുമെന്നും അവര്ക്ക് ആകര്ഷകമായ പലിശ നല്കുമെന്നുമുള്ള ജുവല്ലറിയുടെ വാഗ്ദാനത്തില് കുടുങ്ങി നിരവധി പേര്ക്കാണ് ആഭരണങ്ങളും പണവും നഷ്ടപ്പെട്ടത്.
അല്മുക്താദിര് സ്വര്ണതട്ടിപ്പ് കേസ് ക്രൈംബ്രാഞ്ചിന് വിടണമെന്നും തട്ടിപ്പ് വീരന്മാരായ മന്സൂര്, സാസര്ഹാദി, ബാസിത്ത് എന്നിവരേയും കൂട്ടാളികളെയും ഉടന് അറസ്റ്റ് ചെയ്യണമെന്നും ആവശ്യപ്പെട്ട് കേരള അല് മുക്താദിര് ഇന്വെസ്റ്റേഴ്സ് ഫോറത്തിന്റെ നേതൃത്വത്തില് സെക്രട്ടറിയേറ്റ് മാര്ച്ച് നടത്തി. മാര്ച്ച് മുന് എം.പി ഡോ. എ.സമ്പത്ത് ഉദ്ഘാടനം ചെയ്തു.
ജന്മഭൂമി ഓണ്ലൈന്