കോഴിക്കോട്: വടക്കന് ജില്ലകളില് 58,571 ഹയര് സെക്കന്ഡറി സീറ്റുകളുടെ കുറവ്. സീറ്റ് പ്രതിസന്ധി പരിഹരിക്കാന് കണ്ണില്പൊടിയിടുന്ന സര്ക്കാര് നയങ്ങള്ക്ക് പകരം ശാശ്വത പരിഹാരം വേണമെന്ന് ആവശ്യമുയര്ന്നു. പ്രതിഷേധങ്ങള് അടക്കാന് പ്ലസ് വണ് സീറ്റില് സര്ക്കാര് ആദ്യമേ 30 ശതമാനം അനുപാതിക വര്ധനവാണ് പ്രഖ്യാപിച്ചിരിക്കുന്നത്. എങ്കിലും പ്ലസ് വണ്, വിഎച്ച്എസ്ഇ, ഐടിഐ, പോളിടെക്നിക്ക് തുടങ്ങി മുഴുവന് ഉപരിപഠന സാധ്യതകള് പരിഗണിച്ചാലും മലബാര് ജില്ലകളില് അരലക്ഷത്തിലധികം വിദ്യാര്ത്ഥികള് സീറ്റ് ലഭിക്കാതെ പുറത്തുനില്ക്കേണ്ടി വരും.
മലപ്പുറം ജില്ലയില് മാത്രം എസ്എസ്എല്സി വിജയിച്ച 26,402 കുട്ടികള്ക്ക് സീറ്റ് ലഭിക്കില്ല. പാലക്കാട് 10986 ഉം കോഴിക്കോട് 8643 ഉം സീറ്റുകളുടെ കുറവുണ്ട്. തൃശൂര് 1451, വയനാട് 1878, കണ്ണൂര് 5735, കാസര്കോട് 3476 സീറ്റുകളുടെയും അപര്യാപ്തതയുണ്ട്. സര്ക്കാര് പരിഹാരമായി പറയുന്ന അനുപാതിക സീറ്റ് വര്ധനവ് നടപ്പിലാക്കിയാല്പ്പോലും പതിനായിരക്കണക്കിന് കുട്ടികള്ക്ക് സീറ്റ് ലഭിക്കില്ല.
18,496 വിദ്യാര്ത്ഥികള് മാത്രം എസ്എസ്എല്സിക്ക് വിജയിച്ച കോട്ടയം ജില്ലയില് 228 സയന്സ് ബാച്ചുകളുള്ളപ്പോള് 79,152 പേര് വിജയിച്ച മലപ്പുറം ജില്ലയിലുള്ള സയന്സ് ബാച്ചുകളുടെ എണ്ണം 352 മാത്രമാണ്. സിബിഎസ്ഇ, ഐസിഎസ്ഇ പത്താം ക്ലാസ് വിജയികള്, എസ്എസ്എല്സി സേ പരീക്ഷ വിജയികള് എന്നിവര് കൂടി വരുന്നതോടെ മലബാര് മേഖലയിലെ സീറ്റ് പ്രതിസന്ധി രൂക്ഷമാകും.
തൃശൂര് മുതല് കാസര്കോട് വരെയുള്ള മലബാര് ജില്ലയിലെ 58,571 വിദ്യാര്ത്ഥികള്ക്ക് സീറ്റില്ലാത്ത സ്ഥിതി പരിഹരിക്കാന് 1171 സ്ഥിരം പ്ലസ് വണ് ബാച്ചുകള് സര്ക്കാര് അനുവദിക്കേണ്ടതുണ്ട്. സീറ്റ് പ്രതിസന്ധിയുണ്ടാകുമ്പോള് ക്ലാസ്മുറികളില് കുട്ടികളെ കുത്തിനിറച്ച് പ്രശ്നം പരിഹരിച്ചെന്ന് വരുത്തിത്തീര്ക്കുകയാണ് കഴിഞ്ഞ വര്ഷങ്ങളിലെല്ലാം സര്ക്കാര് ചെയ്തത്. ഇതോടെ പല ക്ലാസുകളിലും 65 ഓളം കുട്ടികളാണ് പഠിച്ചത്. സര്ക്കാര് തന്നെ മാനദണ്ഡമാക്കിയ 50:1 എന്ന വിദ്യാര്ത്ഥി – അധ്യാപക അനുപാതത്തെ അട്ടിമറിക്കുകയാണ് പ്ലസ് വണ് പ്രവേശനം പൂര്ത്തിയാകുമ്പോള് മലബാ
ര് ജില്ലകളില് ഉണ്ടാകുന്നത്.
എന്നാല് തെക്കന് ജില്ലകളില് മുഴുവന് വിദ്യാര്ത്ഥികളുടെയും പ്രവേശനം പൂര്ത്തിയായാലും സീറ്റുകള് ഒഴിഞ്ഞുകിടക്കാറാണ് പതിവ്. കൂടാതെ വിദ്യാര്ത്ഥികള്ക്ക് അവരാഗ്രഹിക്കുന്ന കോഴ്സിന്, ആഗ്രഹിക്കുന്ന സ്കൂളിലും പ്രവേശനം
ലഭിക്കുന്നു. എന്നാല്, മലബാര് ജില്ലകളില് മുഴുവന് എ പ്ലസ് കിട്ടിയ കുട്ടികള്ക്ക് പോലും അവര് ആഗ്രഹിക്കുന്ന കോഴ്സില് പ്രവേശനം ലഭിക്കാതെ കിട്ടുന്ന കോഴ്സില് സംതൃപ്തിയടയേണ്ട സ്ഥിതിയാണ്. പലപ്പോഴും പ്രവേശനം പോലും ലഭിക്കാത്ത അവസ്ഥയും കഴിഞ്ഞ വര്ഷങ്ങളിലെല്ലാം ഉണ്ടായിട്ടുണ്ട്. അതേസമയം ഹയര് സെക്കന്ഡറികളായി ഉയര്ത്താവുന്ന അനവധി ഹൈസ്ക്കൂളുകള് മലബാര് ജില്ലകളിലുണ്ടായിട്ടും കുട്ടികള് തിങ്ങിനിറഞ്ഞു പഠിക്കുന്ന സാഹചര്യം ഒരുക്കാനാണ് സര്ക്കാര് മുന്കൈയെടുക്കുന്നത്.
