കാളിന്ദി എക്‌സ്പ്രസ് അട്ടിമറി ശ്രമം ; പശ്ചിമ ബംഗാളിൽ നിന്നെത്തിയ യുവാവ് കസ്റ്റഡിയിൽ ; തീവ്രവാദ ബന്ധമുണ്ടെന്ന് സംശയിക്കുന്നു

കാൺപൂർ: ഉത്തർപ്രദേശിലെ കാൺപൂരിൽ രണ്ട് ദിവസം മുമ്പ് കാളിന്ദി എക്‌സ്പ്രസ് പാളം തെറ്റിക്കാനുള്ള ശ്രമവുമായി ബന്ധപ്പെട്ട് രണ്ട് ഡസനിലധികം പേരെ ചോദ്യം ചെയ്യുന്നതിനായി കസ്റ്റഡിയിലെടുത്തതായി അധികൃതർ ബുധനാഴ്ച അറിയിച്ചു.

തിങ്കളാഴ്ച ഭിവാനി-പ്രയാഗ്‌രാജ് കാളിന്ദി എക്‌സ്‌പ്രസ്ട്രെയിൻ, റെയിൽവേ ട്രാക്കിൽ സ്ഥാപിച്ചിരുന്ന എൽപിജി സിലിണ്ടറിൽ ഇടിച്ചതിനെത്തുടർന്ന് ലോക്കോ പൈലറ്റിന്റെ ജാഗ്രതയിൽ വലിയ  അപകടം ഒഴിവായിരുന്നു. തുടർന്ന് ലോക്കൽ പോലീസ് എഫ്ഐആർ രജിസ്റ്റർ ചെയ്തതിനെത്തുടർന്ന് അട്ടിമറി ശ്രമത്തെക്കുറിച്ച് സൂചന നൽകുന്ന ഒരു കുപ്പി പെട്രോളും തീപ്പെട്ടികളും സൈറ്റിൽ നിന്ന് കണ്ടെത്തി.

പിന്നീട് എൻഐഎയും യുപി പോലീസിന്റെ തീവ്രവാദ വിരുദ്ധ സ്‌ക്വാഡും ഉൾപ്പെടെയുള്ള വിവിധ ഏജൻസികൾ ചേർന്ന് അന്വേഷണം ആരംഭിച്ചു. ഉദ്യോഗസ്ഥർ തീവ്രവാദ ബന്ധമുണ്ടെന്ന് സംശയിക്കുന്നുണ്ട്. ഇതിന്റെ അടിസ്ഥാനത്തിൽ കർശന പരിശോധനകളാണ് നടന്നുവരുന്നത്.

ഇതേ തുടർന്ന് അര ഡസനോളം ആളുകളെ തിങ്കളാഴ്ച രാത്രി കസ്റ്റഡിയിലെടുത്തു. ഇവരെ പിന്നീട് ചോദ്യം ചെയ്തതിന് ശേഷം വിട്ടയച്ചു. ചൊവ്വാഴ്ച ഒരു കുടുംബത്തിലെ മൂന്ന് പേർ ഉൾപ്പെടെ രണ്ട് ഡസനിലധികം പേരെ പോലീസ് കസ്റ്റഡിയിലെടുത്തു. ചോദ്യം ചെയ്യപ്പെടുന്നവരിൽ പ്രധാനമായും ക്രിമിനൽ പശ്ചാത്തലമുള്ളവരും ഉൾപ്പെടുന്നുണ്ടെന്ന് ഒരു പോലീസ് ഉദ്യോഗസ്ഥൻ പറഞ്ഞു.

പശ്ചിമ ബംഗാളിൽ നിന്ന് അടുത്തിടെ കാൺപൂരിലെത്തിയ ഒരു യുവാവിനെയും പോലീസ് കസ്റ്റഡിയിലെടുത്തിട്ടുണ്ടെന്നും ഉദ്യോഗസ്ഥർ കൂട്ടിച്ചേർത്തു. സംഭവസ്ഥലം സന്ദർശിച്ച അഡീഷണൽ ഡയറക്ടർ ജനറൽ (റെയിൽവേ) പ്രകാശ് ഡി ഈ കേസിൽ പോലീസിന് വഴിത്തിരിവ് ലഭിച്ചിട്ടുണ്ടെന്നും ഇത് ഉടൻ തെളിയിക്കാൻ സാധ്യതയുണ്ടെന്നും അവകാശപ്പെട്ടു.

എൻഐഎ, ഇൻ്റലിജൻസ് ബ്യൂറോ (ഐബി), റെയിൽവേ പ്രൊട്ടക്ഷൻ ഫോഴ്സ് (ആർപിഎഫ്), ഗവൺമെൻ്റ് റെയിൽവേ പൊലീസ് (ജിആർപി), സ്റ്റേറ്റ് ഇൻ്റലിജൻസ്, കാൺപൂർ പോലീസ് രൂപീകരിച്ച പ്രത്യേക അന്വേഷണ സംഘം എന്നിവയുൾപ്പെടെ ഒന്നിലധികം സംസ്ഥാന, കേന്ദ്ര ഏജൻസികൾ കേസ് കണ്ടുപിടിക്കാൻ എത്തിയതായി എഡിജി പറഞ്ഞു.

ഇതിനു പുറമെ നിഗൂഢത പരിഹരിക്കാൻ ഏജൻസികളെ സഹായിക്കാൻ സാധ്യതയുള്ള ചില നിർണായക തെളിവുകളും ലീഡുകളും തങ്ങൾ ശേഖരിച്ചുവെന്നും അദ്ദേഹം കൂട്ടിച്ചേർത്തു. അതേ സമയം കുറ്റകൃത്യം നടന്ന സ്ഥലത്ത് നിന്ന് കണ്ടെടുത്ത തീപ്പെട്ടികളും എൽപിജി സിലിണ്ടറും എങ്ങനെ എത്തപ്പെട്ടു എന്നതിനെ സംബന്ധിച്ച് വിവരം ലഭിച്ചിട്ടില്ലെന്ന് ഡെപ്യൂട്ടി പോലീസ് കമ്മീഷണർ രാജേഷ് കുമാർ സിംഗ് പറഞ്ഞു.

എന്നിരുന്നാലും കേസ് അന്വേഷിക്കാൻ എസ്ഐടി രൂപീകരിച്ച പോലീസ്, പ്രാദേശിക ഏജൻസിയിൽ നിന്ന് അടുത്തിടെ റീഫിൽ ചെയ്ത സിലിണ്ടറുകൾ എടുത്ത 250 എൽപിജി വരിക്കാരെ പരിശോധിച്ചു വരികയാണെന്ന് അദ്ദേഹം പറഞ്ഞു.

കൂടാതെ 20 ദിവസം മുമ്പ് ഇവിടെയുള്ള പങ്കി മേഖലയിൽ അടുത്തിടെ നടന്ന സബർമതി എക്‌സ്പ്രസ് പാളം തെറ്റിയ സംഭവത്തിലും പോലീസ് പരിശോധിക്കുന്നുണ്ട്.