ലക്നൗ : ബുർഖ ധരിച്ച് സ്വർണക്കടയിലെത്തിയ സംഘം കവർന്നത് 20 ലക്ഷം രൂപയുടെ സ്വർണാഭരണങ്ങൾ .ഉത്തർപ്രദേശിലെ സംഭാലിലാണ് സംഭവം. മോഷണത്തിന്റെ ദൃശ്യങ്ങൾ സിസിടിവി ക്യാമറയിൽ പതിഞ്ഞിട്ടുണ്ട്.
ദൃശ്യങ്ങളുടെ അടിസ്ഥാനത്തിൽ പോലീസ് തിരച്ചിൽ ആരംഭിച്ചു. കഴിഞ്ഞ ദിവസം ഉച്ചയോടെയാണ്, മൊഹല്ല സെത്തോൺ ഗലി നിവാസിയായ ശിവകുമാർ അഗർവാളിന്റെ ജ്വല്ലറിയിൽ മോഷണം നടന്നത് . ആദ്യം ബുർഖ ധരിച്ച് ഒരാളാണ് ജ്വല്ലറിയിലെത്തിയത് . ഇവർ കൈ ചെയിൻ കാണിക്കാനാണ് ശിവകുമാറിനോട് ആവശ്യപ്പെട്ടത് .
ശിവകുമാർ കൈ ചെയിൻ കാണിക്കുന്നതിനിടെ രണ്ട് പേർ കൂടി ഷോറൂമിലെത്തി. ഇവർ ആവശ്യപ്പെട്ട ആഭരണങ്ങൾ കാണിച്ചെങ്കിലും യാതൊന്നും വാങ്ങാൻ തയ്യാറാകാതെ മൂവരും മടങ്ങി . ഇവർ പോയ ശേഷം സ്റ്റോക്ക് പരിശോധിക്കുന്നതിനിടെയാണ് ആഭരണങ്ങൾ നഷ്ടപ്പെട്ട വിവരം അറിയുന്നത് . പിന്നാലെ ശിവകുമാർ പൊലീസിൽ പരാതി നൽകുകയായിരുന്നു.
