കാഞ്ഞങ്ങാട്: അജാനൂര്‍ ശ്രീമദ്പര:ശിവ വിശ്വകര്‍മ്മ ക്ഷേത്രത്തിലെ ഈ വര്‍ഷത്തെ ഋഷി പഞ്ചമി ആഘോഷം 26ന് വിവിധ ആദ്ധ്യാത്മിക കലാസാംസ്‌കാരിക പരിപാടികളോടെ ആഘോഷിക്കും.
ആഘോഷങ്ങളുടെ ഭാഗമായി രാവിലെ വിശേഷാല്‍ പൂജകള്‍ തുടര്‍ന്ന് രാവിലെ ഏഴ് മുതല്‍ 11 വരെ ഭജനസമിതികളുടെ ഭജനാര്‍ച്ചന.
11ന് വീരാട് വിശ്വകര്‍മ്മ ക്ഷേത്ര ട്രസ്റ്റ് ഉദ്ഘാടനം കര്‍ണ്ണാടക സംസ്ഥാന തെരഞ്ഞെടുപ്പ് കമ്മീഷണര്‍ പി.എന്‍.ശ്രീനിവാസ ആചാര്യ ഐഎഎസ് നിര്‍വ്വഹിക്കും. യോഗത്തില്‍ അഖില ഭാരത വിശ്വകര്‍മ്മ മഹാസഭ ചെയര്‍മാന്‍ ഡോ.ഡി.മുരുഗശെല്‍വം ആചാരി മുഖ്യാതിഥിയായിരിക്കും. ടി.ആര്‍.രവി ആചാരി ആലപ്പുഴ മുഖ്യ പ്രഭാഷണം നടത്തും.
സംസ്ഥാന മുന്‍ വിശ്വകര്‍മ്മ സമുദായ കമ്മീഷന്‍ ചെയര്‍മാന്‍ ഡോ.പി.എന്‍.ശങ്കരന്‍, ഡോ.പി.വി.രാഘവന്‍ ഡല്‍ഹി തുടങ്ങിയവര്‍ സംബന്ധിക്കും. തുടര്‍ന്ന് എസ്എസ്എല്‍സി, പ്ലസ്ടു പരീക്ഷകളില്‍ ഉന്നതി വിജയം നേടിയവര്‍ക്ക് ട്രസ്റ്റ് പുരസ്‌ക്കാരവും കാഷ് അവാര്‍ഡും സമ്മാനിക്കും.
ഋഷി പഞ്ചമി ആഘോഷങ്ങളുടെ ഭാഗമായി 25 വിനായക ചതുര്‍ത്ഥി ദിനത്തില്‍ എല്‍പി, യുപി, എച്ച്എസ് വിദ്യാര്‍ത്ഥികള്‍ക്കായി ചിത്രരചനാ മത്സരം സംഘടിപ്പിക്കും.
പ്രതികരിക്കാൻ ഇവിടെ എഴുതുക: