സാംസ്‌കാരിക കേരളം എന്നും പ്രബുദ്ധ കേരളം എന്നു നാം ഉദ്‌ഘോഷിക്കുന്ന മലയാള നാട്ടില്‍ വിസ്ഫോടനാത്മകമായി ഇസ്ലാമിസ്റ്റുകളും കമ്മ്യൂണിസ്റ്റുകളും ചേര്‍ന്ന് ഇവിടത്തെ സംസ്‌കാരത്തെ ഉന്മൂലനം ചെയ്യാനുള്ള നീക്കം കഴിഞ്ഞ തദ്ദേശ ഭരണ തെരഞ്ഞെടുപ്പുകള്‍ക്ക് ശേഷം വളരെ വ്യാപകമായി നടത്തി പോരുന്നു. ഇതിന് വേണ്ടി കമ്മ്യൂണിസം ആശ്രയിക്കുന്നത് ഹുക്കൂമത്തെ ഇസ്ലാമിക്ക് വേണ്ടി നിലകൊള്ളുന്ന ജമാ അത്തെയെയും ജമാ അത്തെയുടെ മത തീവ്രതയേക്കാള്‍ തീവ്രത ഞങ്ങള്‍ക്കാണെന്ന് വാദിക്കുന്ന, മത വിമര്‍ശനം നടത്തുന്നവരെ ഉന്മൂലനം ചെയ്യുന്ന പതിനാറു നൂറ്റാണ്ടുകള്‍ക്ക് മുമ്പുള്ള മത ചിന്തയുമായി പ്രവര്‍ത്തിക്കുന്ന തീവ്രവാദ സംഘടനയായ പോപ്പുലര്‍ ഫ്രണ്ടിനെയും.
കേരള രൂപീകരണത്തിന് ശേഷം, മലപ്പുറത്ത് മാത്രം ഉണ്ടായിരുന്ന പ്രതിഭാസമായിരുന്ന മുസ്ലീം ലീഗിനെ പുനരുജ്ജീവിപ്പിക്കാന്‍ വേണ്ടി സഖാവ് ഇഎംഎസിന്റെ കാര്‍മികത്വത്തില്‍ ‘ചരിത്ര’കാരന്മായ പണിക്കരും വാര്യരും ഇസ്ലാമിക ആക്രമണകാരികളെ വെള്ള പൂശുകയും അതേ സമയം തനതു സംസ്‌കാരത്തിന്റെ പിന്‍തലമുറക്കാരെ ബൂര്‍ശ്വാസികളായും ഫ്യൂഡലിസ്റ്റുകളായും ഉന്മൂലന വാദികളായും പിന്തിരിപ്പന്മാരായും ചിത്രീകരിക്കുകയും ചെയ്തു.
ഇസ്ലാമിക ജിഹാദിന്റെ തനി പകര്‍പ്പായ മാപ്പിള ലഹളയെ കാര്‍ഷിക സമരമാക്കി വഴി തിരിച്ചു വിടാനും, ഹിന്ദുക്കളെ കൊന്നൊടുക്കിയവരെ സ്വാതന്ത്ര്യ സമര സേനാനികളാക്കാനും ഈ ചരിത്രകാരന്മാര്‍ മടിച്ചില്ല. ക്രൂരതയുടെ പ്രതിരൂപമായ ടിപ്പുവും ഹൈദറും ഈ ചരിത്രകാരന്മാര്‍ക്ക് മതേതരത്വത്തിന്റെ ചിഹ്നങ്ങളായിരുന്നു. ഇങ്ങനെ കമ്മ്യൂണിസം ജിഹാദിനെ ന്യായീകരിച്ചും സാമാന്യവല്‍ക്കരിച്ചും കേരള മണ്ണിനെ വിളവെടുക്കാവുന്ന നിലമാക്കി. ആ നിലത്തില്‍ വളരെ വിദഗ്ദമായി വിളവെടുക്കുകയാണ് ജമാ അത്തെ പോലെയുള്ള ഇസ്ലാമിക മത പ്രസ്ഥാനങ്ങള്‍.
കമ്മ്യൂണിസവും ജിഹാദികളും തമ്മിലുള്ള അന്തര്‍ധാര പെട്ടെന്നു ഉല്‍ഭവിച്ച ഒരു സമസ്യ അല്ല, മറിച്ച് ദശകങ്ങളായി അന്യോന്യം കൊടുത്തും വാങ്ങിയും തടിച്ചു കൊഴുത്ത രണ്ടു പരസ്പര പൂരകങ്ങളായ സവിശേഷതയാണ്. ഇതിന്റെ പ്രത്യക്ഷ ഉദാഹരണമായി നമുക്ക് ജമാ അത്തെ പ്രസിദ്ധീകരങ്ങളില്‍ ഇടതു പക്ഷ ചിന്തകന്മാരുടെ അതിപ്രസരം കാണാം. പ്രകാശ് കാരാട്ട് മുതല്‍ ജോണ്‍ ബ്രിട്ടാസ് വരെ റെഡ് ജിഹാദിന് വളം നല്കുന്നു. ഇസ്ലാമിക പ്രസിദ്ധീകരണങ്ങളിലൂടെ ഈ ചിന്തകര്‍ മുസ്ലീം അധീശത്വത്തിന് കോപ്പ് കൂട്ടുന്നു. തങ്ങളുടെ വോട്ട് ബാങ്ക് അടിസ്ഥാന ജനതയാണ് എന്നറിഞ്ഞു തന്നെയാണ് ഇവരുടെ ഈ കൂട്ടായ്മ എന്നുള്ളതാണ് ഇതിലെ സവിശേഷത.
ഹിന്ദു ദേവതാ സംഘല്‍പ്പങ്ങളെ വികൃതമാക്കി ചിത്രീകരിക്കാന്‍ വെമ്പുന്ന ഇടതുപക്ഷ ചിന്തകന്മാര്‍, തങ്ങളുടെ ആശയങ്ങള്‍ പ്രചരിപ്പിക്കുന്നതോ? ഇസ്ലാമിക പ്രസിദ്ധീകരണങ്ങളിലും. ഇതെങ്ങനെ സംഭവിക്കുന്നു എന്നു ചിന്തിക്കേണ്ടത് മത രഹിതനാണെന്നും, മതനിരപേക്ഷനാണ് എന്നും സ്വയം ആശ്വസിക്കുന്ന കമ്മ്യൂണിസ്റ്റ് പ്രസ്ഥാനങ്ങളിലെ അടിസ്ഥാന ജനതയാണ്. ഭാരതത്തിലെ തനതു വിശ്വാസ പ്രമാണങ്ങളെ താറടിക്കുന്ന ഇടതുപക്ഷ ചിന്തകന്മാര്‍ ഇസ്ലാമിക അധിനിവേശത്തിനും പ്രമാണികള്‍ക്കും പച്ചക്കൊടി വീശുകയും വെള്ള കുപ്പായം ധരിപ്പിക്കുകയും ചെയ്യുന്നു. ഇസ്ലാമിക തീവ്രവാദത്തിനെ എപ്പോഴും മാനവികതയുടെ മുഖം നല്കി സംരക്ഷിക്കാന്‍ ശ്രമിക്കുന്ന ഇടതു പക്ഷ ചിന്തകന്മാര്‍, അടിസ്ഥാന ജനതയുടെ പ്രതിരോധത്തെ അപരാധമാക്കി തീര്‍ക്കാന്‍ വേണ്ടി കിണഞ്ഞു പരിശ്രമിക്കുന്നു.
കേരളം പൂര്‍ണമായും ഭരിക്കുന്നതും നിയന്ത്രിക്കുന്നതും സെമിറ്റിക് മത ചിന്തകളാണെന്നും, അതിലൂടെ ഉരുത്തിരിഞ്ഞു വന്ന രാഷ്‌ട്രീയ പ്രസ്ഥാനങ്ങളാണെന്നും മനസ്സിലാക്കുന്നതില്‍ ഇവിടത്തെ അടിസ്ഥാന ജനത പരാജയപ്പെടുന്നത് കൂടി റെഡ് ജിഹാദിന് വളം നല്‍കാന്‍ ഇടതുപക്ഷ ചിന്തകരെ പ്രേരിപ്പിക്കുന്നു. സ്ത്രീകളെ ആചാരപരമായ നിബന്ധനകളാല്‍ ക്ഷേത്രങ്ങളിലേക്ക് പ്രവേശിപ്പിക്കാത്തത് മഹാ അപരാധമായി കരുതുന്ന ഇടതുപക്ഷ ചിന്തകന്മാര്‍ ബഹു ഭാര്യാത്വവും അടിമത്തവും സ്ത്രീകള്‍ക്ക് സമ്മാനിക്കുന്ന മത ചിന്തയെ താലോലിക്കുന്നു. അത്തരം ചിന്തകള്‍ മുസ്ലീം സമൂഹത്തില്‍ പ്രചരിപ്പിക്കുന്ന ഇസ്ലാമിക പ്രസിദ്ധീകരണങ്ങളില്‍ ഹിന്ദു സമൂഹത്തിലെ സ്ത്രീ വിരുദ്ധതയെ കുറിച്ച് കാവ്യങ്ങള്‍ രചിക്കുന്നു.
എ.കെ ഗോപാലനും സംഘവും ഇടതു പക്ഷത്തിന് ഇപ്പോ പ്രസക്തിയില്ലാതായിരിക്കുന്നു. മുല്ലപ്പൂ വിപ്ലവം ഭാരതത്തില്‍ നടപ്പാക്കാന്‍ ശ്രമിക്കുന്ന, ഐഎസ്‌ഐഎസിനെ ആദ്യം പുകഴ്‌ത്തി പിന്നീട് തങ്ങളുടെ നിലപാടുകള്‍ മിഡില്‍ ഈസ്റ്റില്‍ തങ്ങള്‍ക്ക് വിഷമകരമാവും എന്നു തിരിച്ചറിഞ്ഞു ഐഎസ്‌ഐഎസിനെ ‘യഥാര്‍ത്ഥ ഇസ്ലാമല്ല’ എന്നുള്ള ഭാഷ്യം നല്കി ദൂരെ മാറ്റി വെച്ച ജമാ അത്തെയാന്‍ ചിന്തകളും ഇസ്ലാമിക മത വിപ്ലവകാരികളുമാണ് ഇപ്പോള്‍ ഇടതു പക്ഷത്തിന് കൂടുതല്‍ പഥ്യം.
ഇത് കേവലം കേരളത്തില്‍ ഒതുങ്ങി നില്‍ക്കുന്ന പ്രതിഭാസമല്ല, ബംഗാളില്‍ ഭരണം നിലനിര്‍ത്താന്‍ വേണ്ടി ശ്രീകൃഷ്ണനെ ആഭാസനായി ചിത്രീകരിക്കാനും മുഹമ്മദ് നബിയെ കാരുണ്യത്തിന്റെ പര്യായമായി ചിത്രീകരിക്കാനും ഇടതു പക്ഷത്തിന് യാതൊരു മടിയുമില്ല. പിഞ്ചു കുട്ടികളുടെ പാഠപുസ്തകങ്ങളിലാണ് ഇത്തരം ആഭാസങ്ങള്‍ തിരുകി കയറ്റുന്നത് എന്നുള്ളത് ജിഹാദികളും കമ്മ്യൂണിസവും തമ്മിലെ അന്തര്‍ധാരയെ കൂടുതല്‍ വ്യക്തമാക്കി തരുന്നു.
പാക്കിസ്ഥാന്‍ നിര്‍മാണത്തിന് കാരണമായി ഇടതു പക്ഷ ചിന്തകര്‍ വിരല്‍ ചൂണ്ടുന്നത് ഹിന്ദു ദേശീയത എന്ന് അവര്‍ വിളിക്കുന്ന സ്വാതന്ത്ര്യ സമര ദേശീയ പ്രസ്ഥാനങ്ങളെയാണ്. ഇത്രയും അധപതിക്കാന്‍ ഇവര്‍ക്ക് സാധിക്കുന്നത് എന്തുകൊണ്ടാണെന്നു ഓരോ കമ്മ്യൂണിസ്റ്റുകാരനും ചിന്തിക്കേണ്ടിയിരിക്കുന്നു.
പ്രതികരിക്കാൻ ഇവിടെ എഴുതുക: