മുഹമ്മ: വേദവ്യാസ വിദ്യാപീഠം 2017ല്‍ ഹൈസ്‌കൂള്‍ ക്ലാസുകള്‍ ആരംഭിക്കുന്നതിനായി നിര്‍മിക്കുന്ന വിവേകാനന്ദ ബ്ലോക്കിന്റെയും പത്മശ്രീ പി. പരമേശ്വരന് നവതി ഹാളിന്റെയും ശിലാസ്ഥാപനം നടന്നു. ശിലാസ്ഥാപന കര്‍മ്മം ഭാരതീയ വിചാരകേന്ദ്രം ഡയറക്ടര്‍ പി. പരമേശ്വരന് നിര്‍വഹിച്ചു. 2016 ഒക്‌ടോബറില്‍ വിജയദശമി നാളില്‍ നവതി ആഘോഷിക്കുന്ന പി. പരമേശ്വരന് നവതി സമ്മാനമായാണ് സ്‌കൂള്‍ കെട്ടിടം അദ്ദേഹത്തിന്റെ ജന്മനാടായ മുഹമ്മ കൊച്ചനാകുളങ്ങരയില്‍ നിര്‍മിക്കുന്നത്.
വേദവ്യാസ വിദ്യാപീഠത്തില്‍ ഹൈസ്‌കൂള്‍ ആരംഭിക്കുന്നതിനായി നിര്‍മിക്കുന്ന കെട്ടിടം എത്രയും വേഗം പൂര്‍ത്തിയാകട്ടെ എന്ന് പി. പരമേശ്വരന് ആശംസിച്ചു. ഇവിടെ പഠിച്ച് വളരുന്ന പുത്തന്‍തലമുറ ഭാരത സംസ്‌കൃതിയുടെ പ്രകാശം പരത്തുന്നവരായി തീരട്ടെ എന്ന് അദ്ദേഹം പറഞ്ഞു.
പ്രശസ്ത ചിന്തകനും വാഗ്മിയും കവിയുമായ പി. പരമേശ്വരന് ഭാരതത്തില്‍ ആദ്യമായാണ് ഇത്തരമൊരു മന്ദിരം ഉയരുന്നത്. രാഷ്‌ട്രീയ സ്വയംസേവക സംഘത്തിന്റെ മുഴുവന്‍ സമയ പ്രവര്‍ത്തകനായി തന്റെ ജീവിതം സമര്‍പ്പിച്ച വ്യക്തിയാണ് പരമേശ്വര്‍ജി. ഡല്‍ഹിയിലെ ദീന്‍-ദയാല്‍ റിസര്‍ച്ച് ഇന്‍സ്റ്റിറ്റ്യൂട്ട് ഡയറക്ടറായും അദ്ദേഹം സേവനം അനുഷ്ഠിച്ചിട്ടുണ്ട്. നാലായിരം ചതുരശ്ര അടി വിസ്തൃതിയില്‍ നിര്‍മിക്കുന്ന മന്ദിരത്തിന് ഏകദേശം 60 ലക്ഷം രൂപയാണ് ചെലവുപ്രതീക്ഷിക്കുന്നത്.
82 മുതല്‍ ഭാരതീയ വിചാരകേന്ദ്രത്തിന്റെ ഡയറക്ടറും വിവേകാന്ദ കേന്ദ്രത്തിന്റെ അധ്യക്ഷനുമായി പ്രവര്‍ത്തിച്ചുവരുന്ന അദ്ദേഹത്തിന് രാജ്യം പത്മശ്രീ പുരസ്‌ക്കാരം നല്‍കി ആദരിച്ചിട്ടുണ്ട്. സാംസ്‌ക്കാരിക സമ്മേളനം ആര്‍എസ്എസ് ജില്ലാസംഘചാലക് ഡോ. അമ്പലപ്പുഴ ഗോപകുമാര്‍ ഉദ്ഘാടനം ചെയ്തു. സ്‌കൂള്‍ പ്രസിഡന്റ് അഡ്വ. രവിമേനോന്‍ അധ്യക്ഷത വഹിച്ചു.
പ്രതികരിക്കാൻ ഇവിടെ എഴുതുക: