ഇടുക്കി: റിപ്പോര്ട്ടര് ചാനല് മേധാവി നികേഷ്കുമാറിനും ഭാര്യ റാണി വര്ഗീസിനുമെതിരെ ഒന്നരക്കോടിയുടെ തട്ടിപ്പ് കേസ്. തൊടുപുഴ പോലീസ് സ്റ്റേഷനിലാണ് 2016/235 എന്ന ക്രൈംനമ്പര് പ്രകാരം കേസെടുത്തിരിക്കുന്നത്.
തൊടുപുഴയിലെ കോണ്ഗ്രസ് നേതാവ് സി.പി മാത്യുവിന്റെ ഭാര്യ കരിമണ്ണൂര് കോയിക്കത്താനത്ത് ലാലി ഇടുക്കി എസ്.പിക്ക് നല്കിയ പരാതിയെത്തുടര്ന്നാണ് പോലീസ് നടപടി. ഈ പരാതി തൊടുപുഴ ഡിവൈഎസ്പിക്ക് കേസെടുക്കാനായി എസ്.പി കൈമാറുകയായിരുന്നു. തൊടുപുഴ സ്റ്റേഷനില് എഫ്ഐആര് തയ്യാറാക്കി 406,420,465,467,468,471 എന്നിങ്ങനെയുള്ള വകുപ്പുകളിലാണ് കേസെടുത്തിരിക്കുന്നത്.
2010ല് നികേഷ് ആരംഭിച്ച ഇന്ഡോ ഏഷ്യന് ന്യൂസ് ചാനലിന്റെ(റിപ്പോര്ട്ടര്)ഷെയറായി ലാലിയില് നിന്നും ഒന്നരക്കോടി രൂപ നികേഷിന്റെ കമ്പനി വാങ്ങി. തൊടുപുഴയിലെ സൗത്ത് ഇന്ഡ്യന് ബാങ്ക് മുഖേനയാണ് ഈ തുകയുടെ ചെക്ക് മാറിയെടുത്തത്. ഒന്നരക്കോടി നല്കിയപ്പോള് ചാനലിന്റെ പ്രധാന പോസ്റ്റും ആയിരം രൂപയുടെ ഒന്നരലക്ഷം ഷെയറും നല്കാമെന്നാണ് പറഞ്ഞിരുന്നത്. എന്നാല് ലാലിയുടെ പേരില് ഷെയര് നല്കാതെ വ്യാജ രേഖകളുണ്ടാക്കി ഷെയര് കൈമാറ്റം നടത്തിയെന്നാണ് എഫ്ഐആറില് പറഞ്ഞിരിക്കുന്നത്. എഫ്ഐആര് തയ്യാറാക്കിയെങ്കിലും അന്വേഷണ ഉദ്യോഗസ്ഥനെ നിശ്ചയിച്ചിട്ടില്ല.
പ്രതികരിക്കാൻ ഇവിടെ എഴുതുക: