തുറവൂര്‍: മോഷ്ടിച്ച ബൈക്കുമായി പോകുകയായിരുന്ന യുവാക്കളെ കുത്തിയതോട് പോലീസ് പിടികൂടി. വളമംഗംലം മല്ലികശേരില്‍ ധനേഷ് (29), എറണാകുളം നായരമ്പലം ചെത്തിത്തറ വീട്ടില്‍ സുമേഷ് (31) എന്നിവരെ തിങ്കളാഴ്ച പുലര്‍ച്ചെ മൂന്നിനാണ് കുത്തിയതോട് പോലീസ് തുറവൂര്‍ റെയില്‍വേ സ്‌റ്റേഷനു സമീപത്തുനിന്നു പിടികൂടിയത്.
ചേര്‍ത്തല റെയില്‍വേ സ്‌റ്റേഷനില്‍ നിന്ന് മുട്ടത്തിപ്പറമ്പ് സ്വദേശിയായ രാധാകൃഷ്ണന്റെ ബൈക്ക് ഇവര്‍ മോഷ്ടിച്ചിരുന്നു. ഈ ബൈക്കില്‍ തുറവൂരിലെത്തിയപ്പോഴാണ് എസ്‌ഐ: തോമസ് ഡാമിയെനും സംഘവും കൈകാണിച്ചത്. എന്നാല്‍ ഇവര്‍ നിര്‍ത്താതെ പോയതിനെ തുടര്‍ന്ന് പോലീസ് പിന്‍തുടര്‍ന്നു പിടിക്കുകയായിരുന്നു. തുറവൂര്‍ വെസ്റ്റ് യുപി സ്‌കൂളിന്റെ ഓഫീസില്‍ നിന്ന് ലാപ്‌ടോപ്പും ക്യാമറയും പണവും മോഷ്ടിച്ചിരുന്നു.
രണ്ടാഴ്ച മുമ്പ് പട്ടണക്കാട് സ്‌റ്റേഷന്‍ പരിധിയില്‍ രണ്ട് മോഷണങ്ങള്‍ നടത്തിയിരുന്നു. ലോട്ടറിക്കടയില്‍ നിന്ന് ലോട്ടറി ടിക്കറ്റും പണവും കവര്‍ന്നകേസിലും തൊട്ടടുത്ത ബേക്കറിയില്‍ നിന്ന് മൊബൈല്‍ റീച്ചാര്‍ജ് കൂപ്പണും പണവും കവര്‍ന്ന കേസിലും ഇവര്‍ പ്രതികളാണ്.
പ്രതികരിക്കാൻ ഇവിടെ എഴുതുക: