കുട്ടി മോഷ്ടാക്കളെ നാട്ടുകാര്‍ പിടികൂടി

അമ്പലപ്പുഴ: സ്‌കൂളില്‍ പ്രൊജക്ടര്‍ മോഷ്ടിക്കാനെത്തിയ രണ്ട് വിദ്യാര്‍ത്ഥികളെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചു. നീര്‍ക്കുന്നത്തുള്ള ഒരു സ്വകാര്യ ഇംഗ്ലീഷ് മീഡിയം സ്‌കൂളിലാണ് 14 വയസ് വീതമുള്ള മൂന്ന് കുട്ടികള്‍ മോഷണത്തിന് എത്തിയത്. ഒരാഴ്ച മുന്‍പ് ഈ സ്‌കൂളില്‍ നിന്ന് പ്രൊജക്ടറിന്റെ റിമോട്ട് മോഷണം പോയിരുന്നു. കഴിഞ്ഞ ദിവസം വൈകിട്ട് ആറോടെയാണ് മൂന്ന് കുട്ടികള്‍ ക്ലാസ് മുറിയുടെ വാതില്‍ കുത്തിതുറക്കുന്നത് പരിസരവാസികളായ സ്ത്രീകളുടെ ശ്രദ്ധയില്‍പ്പെടുന്നത്. ഇവര്‍ പറഞ്ഞതനുസരിച്ച് നാട്ടുകാര്‍ എത്തിയപ്പോഴേക്കും വാതില്‍ പൊളിച്ച് കുട്ടികള്‍ അകത്ത് കടന്നിരുന്നു. നാട്ടുകാര്‍ രണ്ടുപേരെ പിടികൂടി അമ്പലപ്പുഴ പോലീസിന് കൈമാറി, ഒരാള്‍ ഓടി രക്ഷപ്പെട്ടു. പ്രൊജക്ടര്‍ അഴിച്ച് മാറ്റാനായി ഉപയോഗിച്ചിരുന്ന ഉപകരണങ്ങളും ഇവരില്‍ നിന്ന് കണ്ടെടുത്തിട്ടുണ്ട്.