ന്യൂദല്ഹി: കേരളം സമര്പ്പിച്ച വാര്ഷിക പദ്ധതിക്ക് കേന്ദ്ര ആസൂത്രണ കമ്മീഷന്റെ അംഗീകാരം. കേരളം സമര്പ്പിച്ച 14,010 കോടി രൂപയുടെ പദ്ധതിക്ക് ആസൂത്രണ കമ്മീഷന് അംഗീകാരം നല്കിയതിന് പുറമെ അധിക കേന്ദ്രസഹായമായി 320 കോടി രൂപ കൂടി അനുവദിച്ചതായി ആസൂത്രണ കമ്മീഷന്ഉപാധ്യക്ഷന് എം.എസ്. ആലുവാലിയ അറിയിച്ചു. മുഖ്യമന്ത്രി നയിച്ച മന്ത്രിമാരുടെ സംഘത്തിനാണ് ആലുവാലിയ ഇതുസംബന്ധിച്ച ഉറപ്പ് നല്കിയത്.
ദേശീയ ഗെയിംസ്, ആരോഗ്യമേഖല, സ്കില് ഡവലപ്മെന്റ് തുടങ്ങിയവക്കുവേണ്ടി മൊത്തം 620 കോടി രൂപയാണ് അനുവദിച്ചത്. ആദ്യഗഡുവായ 320 കോടി രൂപ ഉടന്തന്നെ നല്കുമെന്നും വിശദമായ പദ്ധതി തയ്യാറാക്കി നല്കിയാല് ബാക്കി തുകകൂടി ലഭിക്കും. മുഖ്യമന്ത്രിക്ക് പുറമെ മന്ത്രിമാരായ കെ.എം. മാണി, കെ.സി. ജോസഫ്, ചീഫ് സെക്രട്ടറി കെ.ജയകുമാര്, സംസ്ഥാന ആസൂത്രണ ബോര്ഡ് ഉപാധ്യക്ഷന് കെ.എം. ചന്ദ്രശേഖര് തുടങ്ങിയവര് ചര്ച്ചയില് പങ്കെടുത്തു.
പ്രതികരിക്കാൻ ഇവിടെ എഴുതുക: